Oqýshylardyń amandasý ádebine qatysty usynymdar ázirlenip jatyr — Súleımenova
ASTANA. KAZINFORM — bilim alýshylardyń amandasý ádebine baılanysty ádistemelik usynymdar ázirlenip jatyr. Bul týraly Quryltaı depýtattarynyń saýalyna Oqý-aǵartý mınıstri Juldyz Súleımenovanyń jaýabynda aıtylǵan.
— Memleket basshysy Qasym-Jomart Kemeluly Toqaev Túrkistan qalasynda ótken Ulttyq quryltaıdyń ІІ otyrysynda bergen tapsyrmasyna sáıkes «Adal azamat» birtutas tárbıe baǵdarlamasy ázirlendi. «Adal azamat» birtutas tárbıe baǵdarlamasynyń aıasynda jańa halyqtyq Konstıtýtsııanyń qundylyqtary, «Taza Qazaqstan», «Zań men Tártip», «Eńbek adamy» ıdeologemalary negizinde bilim alýshylardyń boıynda ulttyq jáne jalpyadamzattyq qundylyqtardy qalyptastyrýǵa, mádenı minez-qulyq pen ádep normalaryn saqtaýǵa, jaýapkershilik pen ózara qurmetti damytýǵa baǵyttalǵan júıeli tárbıe jumysy júrgizilip jatyr.
Baǵdarlamanyń negizgi qundylyqtary — táýelsizdik pen patrıotızm, birlik pen yntymaq, ádildik pen jaýapkershilik, zań men tártip, eńbekqorlyq pen kásibı biliktilik, jasampazdyq pen jańashyldyq Memlekettik jalpyǵa mindetti bilim berý standartyna jáne bilim berý uıymdaryndaǵy oqý-tárbıe protsesiniń mazmunyna engizildi, — dedi mınıstr.
Onyń atap ótýinshe, qazirgi ýaqytta baǵdarlama respýblıkadaǵy barlyq 20 877 bilim berý uıymynda (12 066 mektepke deıingi uıymda, 8 048 mektepte jáne 763 kolledjde) oqý jáne sabaqtan tys tárbıe jumystary, synyp jáne kýrs saǵattary aıasynda júzege asyrylady.
— Osy rette, bilim alýshylardyń amandasý ádebin qalyptastyrý máselesi — ulttyq mádenıet pen dástúrdi dáripteý, úlkendi qurmetteý, kishige izet kórsetý, ózara syılastyq pen ádeptilik qundylyqtaryn ornyqtyrý turǵysynan ózekti. Memleket basshysynyń amandasý ádebin ulttyq qundylyqtarǵa saı damytý jónindegi tapsyrmasy tárbıe jumysyn jetildirýge negiz bolady. Búginde Oqý-aǵartý mınıstrliginiń Y.Altynsarın atyndaǵy Ulttyq bilim akademııasy ǵalymdar, sarapshylar, azamattyq qoǵam ókilderinen jumys tobyn qurdy. Bilim alýshylardyń amandasý ádebine baılanysty ádistemelik usynymdar ázirleý jumystary júrgizilip jatyr, — dedi Juldyz Súleımenova.
Mınıstr atalǵan usynymdardyń mazmunynda bilim berý protsesine qatysýshylardyń, múddeli taraptardyń, memlekettik organdardyń usynystary men pikirleri eskeriletinin jáne depýtattarmen qosymsha talqylanatynyn atap ótedi.
Buǵan deıin depýtat Erlan Saıyr mektepterde amandasý ádebin kúndelikti tárbıe jumysynyń turaqty elementi retinde engizýdi usynǵan edi.
