Oqýshylardy mektepke daıyndaý úshin ata-analarǵa shamamen 20 mlrd teńge aýdaryldy
ASTANA. KAZINFORM – «Jalpyǵa birdeı bilim berý» qory aıasynda ata-analardyń jáne zańdy ókilderdiń esepshottaryna mektep formasyn, aıaq kıim men oqý-quraldaryn satyp alý úshin shamamen 20 mlrd teńge aýdaryldy. Bul týraly Oqý-aǵartý mınıstrliginiń baspasóz qyzmeti habarlady.
Qoldaý 430 myńnan astam balany qamtydy, bul jalpy alýshylar sanynyń 87%-yna jýyq.
2025 jyly kómek 500 myńnan astam balaǵa kórsetiledi. Onyń ishinde — jetim balalar, ata-anasynyń qamqorlyǵynsyz qalǵandar, az qamtamasyz etilgen jáne ataýly áleýmettik kómek alýshy otbasylardyń balalary, sondaı-aq ómirlik qıyn jaǵdaıǵa tap bolǵan balalar bar.
Búginde Astana men Shymkent qalalarynda qarajat tolyq kólemde aýdarylyp, 100% otbasy kómek aldy.
— Óńirler ata-analardyń esepshottaryna qarajatty belsendi túrde aýdarýda. Kómek alǵandar satyp alynǵan taýarlardy rastaıtyn qujattardy usynýy tıis. Tólemdi alý úshin ótinish jazý jetkilikti, — dep atap ótti Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.
2025 jyly «Jalpyǵa birdeı bilim berý» qory boıynsha jalpy qarjylandyrý kólemi 23,1 mlrd teńgeni quraıdy. Tólem mólsheri óńirlik bıýdjetke sáıkes, máslıhat sheshimi negizinde belgilenedi jáne bir balaǵa keminde 46 228 teńgeden tómen bolmaýy tıis.
Aıta ketý kerek, 2023 jyldan beri materıaldyq kómek kólemi 2,5 esege ósip, 17 myńnan 46 myń teńgege deıin artty.
Aıta ketelik ǵylymdy damytý salasynda 42,5 mlrd teńge tıimsiz paıdalanylǵany týraly jazǵan edik.