Oqýshylardy kolledjde qatar oqytý: Parlament pen Úkimet ortaq kelisimge kele almaı jatyr

ASTANA. KAZINFORM – Májilis depýtaty Juldyz Súleımenova nelikten 10-11 synyp oqýshylaryn kolledjde qatar oqytý qajettigin túsindirdi.

Onyń aıtýynsha, eńbek naryǵy ózgerip keledi jáne báriniń joǵary bilimdi bolýy mindetti emes.

Ótken jyly depýtattar 10-11 synyp oqýshylaryna kolledjde qatar oqý múmkindigin berýdi usynǵan edi. Sebebi elimizde 11-synyp bitirgen túlekterdiń 50 myńy qaıtadan kolledjderge túsedi jáne bir pándi qaıtalap oqýǵa májbúr.

– Qazirgi mektep túlekteri kitap-dápter ǵana ustaı alady, úıinde ata-anasy jumysqa ıkemdemese, biryńǵaı aqsaýsaq balalardy ósirip jatyrmyz. Buryn Eńbek pánine kóp mán berilse, qazir bilim berý standarty ózgerip, ony da joǵaltyp aldyq. Bala 11 jyl oqyp, tek attestat qana emes, tigin tigý, shege qaǵý, dánekerleý sekildi bir kásipti meńgerip shyǵýy kerek. Qazir bári mektepten keıin japa-tarmaǵaı ýnıversıtetke barady. Meniń bilýimshe, Astanadaǵy taksı júrgizýshileriniń 25% – joǵary bilimdi azamattar. Kelesi jyldary Qazaqstanda kolledj bitirgen jumysshy mamandyqtarǵa suranys 70% deıin ósedi. ıAǵnı, báriniń joǵary bilimdi bolýy qajet emes, bizde eńbek naryǵy aýysyp jatyr, - dedi depýtat agenttiktiń «Bizdin orta» podkastynda.

Onyń aıtýynsha, eńbek naryǵyn retteý – azamattarymyz shege qaǵyp júrip-aq, jaqsy jalaqy alyp, eńbek quqyǵy qorǵalyp, qaýipsizdigi saqtalatynyn aıtý, sapaly jumys oryndarymen qamtamasyz etý.

– Qazir kolledjder bul ıdeıamen kelispeı jatyr. Sonsha oqýshyny saqtandyrý, eńbek qaýipsizdigi máselesine qatysty Úkimetpen ortaq kelisimge kele almaı jatyrmyz. Degenmen, eki jylda oqýshy naqty kásipti meńgerip shyqsa, balanyń ózine senimdiligin arttyrar edik, sol kásiptiń arqasynda ári qaraı joǵary bilimin alyp, isin keńeıte alar edi, - deıdi Májilis depýtaty.

Osyǵan deıin depýtat eńbek naryǵy úzdiksiz ózgerip otyratynyn aıtqan edi.

- Keı memleketter 4 kúndik jumys aptasyn, 4-6 saǵattyq jumys kestesin engizip jatyr. Bul urpaqtyń aýysýymen baılanysty. ıAǵnı belgili bir qundylyǵy bar býyn eńbek naryǵynan ketip, olardyń ornyna jańa urpaq keldi, -deıdi halyq qalaýlysy.