Oqýshylar úshin JI aqyly tarıfi tegin bolýy múmkin be — vıtse-mınıstr jaýaby
ASTANA. KAZINFORM — Jasandy ıntellekt jáne tsıfrlyq damý vıtse-mınıstri Ǵızzat Baıtursynov jasandy ıntellektiginiń aqyly tarıfterin mektep oqýshylary men stýdentterge tegin jasaý múmkindigine qatysty pikir bildirdi.
Úkimet otyrysynyń qorytyndysyna oraı uıymdastyrylǵan baspasóz máslıhaty barysynda BAQ ókilderi vıtse-mınıstrden stýdentter men oqýshylar úshin jasandy ıntellektiniń aqyly tarıfin tegin jasaý múmkindigin suraǵan edi.
Saýalǵa jaýap bergen mınıstrdiń aıtýynsha, byltyr mınıstrlik OpenAI-men kelisimshartqa qol qoıyp, 165 myń ChatGPT Edu lıtsenzııasyn muǵalimderge taratyp bergen.
— Qazirgi ýaqytta sol 165 myń lıtsenzııanyń 118 myńyn mektep muǵalimderiniń, ýnıversıtet oqytýshylarynyń qoldanýǵa múmkindigi bar. Olar osy platformany jumysynda, balalardy oqytý barysynda qoldanýǵa, kómek alýǵa múmkindigi bar. Oqýshylarǵa keler bolsaq, dál qazirgi ýaqytta ondaı maqsat aldymyzda turǵan joq, biraq bolashaqta múmkindik bolǵan jaǵdaıda mindetti túrde aqparat beremiz, — dedi Ǵızzat Baıtursynov.
Buǵan deıin Qazaqstan 2026 jyly bilim berý júıesi aıasynda ChatGPT Edu platformasyn engizýge kirisken álemdegi alǵashqy elderdiń biri bolǵanyn jazǵan edik.
