Oqýshylar táttiden ýlandy: Aqtóbede is qozǵalyp, tergeý júrip jatyr
AQTÓBE. KAZINFORM – Aqtóbede oqýshylardyń ýlaný deregine qatysty is tirkelip, tergeý júrip jatyr. Al balalardyń densaýlyǵyn tekserýge oblystan taǵy mamandar jiberildi.
Aqtóbe oblysy Qobda aýdany Qobylandy batyr atyndaǵy orta mekteptegi ýlaný dereginen soń aýrýhanaǵa bir emes, birneshe dáriger jiberilgen. Aýdan ákiminiń orynbasary Arman Qabylov mán-jaıdy baıandap berdi.
- 18 aqpan kúni tústen keıin bolǵan jaǵdaı bul. 4 synyp oqýshysy bilim berý uıymynan tys jerde, ıaǵnı, dúkennen Qytaı ónimin alǵan. Dúkennen túrli tátti kórip júrmiz, sony alǵan. Qazaqsha, oryssha emes, qytaısha jazylǵan syrtynda. Synypqa aparady, ony 7 bala jeıdi. Al qalǵandarynyń ıisten júregi aınyp, kózi jasaýraǵan, bórtpe shyqqan. Synyp jetekshisi sony baıqap, jedel járdemge, mektep ákimshiligine, ata-analarǵa habar berdi. Aýdandyq aýrýhanaǵa aparady. Sol kúni bir synyptyń 23 oqýshysy aýrýhanaǵa jatqyzyldy. Negizinen 7 oqýshydan ýlaný belgisi basym bolǵan. Sol kezde 4 ata-ana qolhat jazyp, balalaryn úıine alyp ketti. Sóıtip 19-y aýrýhanaǵa jatyp, dárigerler baqylaýynda boldy. Al búgin 10 balany úıge shyǵardy. Aýrýhanada barlyǵy 9 bala jatyr. Onyń jeteýi táttiniń dámin tatqan, al eki balanyń túnde qyzýy kóterilgen. Buǵan deıin de oblystan dáriger kelip qaraǵan. Taǵy da balalar ınfektsıonısi men qulaq, muryn, tamaqty qaraıtyn maman kele jatyr. Qarap, densaýlyǵyn baqylaıdy. Erteń bárin shyǵarady úıine,- dedi aýdan ákiminiń orynbasary Arman Qabylov.
Onyń aıtýynsha, epıdemıolog mamandar da kelip, qarap ketken.
- Táttini qaı dúkennen alǵany belgili. Aýdandyq polıtsııa bólimi derekti tirkedi. Qylmystyq is qozǵalýy múmkin. Dúken ıesine, satýshylaryna balalardyń ýlanǵany týraly aqparat berildi. Al muǵalimder din aman, olarǵa keri áseri bolmady. Qazirgi kezde aýdandyq bilim bólimi mektepterge eskertip, saq bolýǵa shaqyrdy. Ata-analar, balalar bul týraly bilýi kerek,- dedi Arman Qabylov.
Al Aqtóbe oblystyq Polıtsııa departamenti baspasóz qyzmeti osy oqıǵadan soń is qozǵalǵanyn, tergeý júrip jatqanyn rastady. Alaıda qaı bap boıynsha ekenin aıtpady.
Aıta keteıik, Aqtóbe oblysy Qobda aýdanynda oqýshylar táttiden ýlandy. Qazir 9 bala aýrýhanada jatyr.