Oqýshylar men sarbazdardy jylqy etimen tamaqtandyrý kerek - depýtat
ASTANA. KAZINFORM — Jylqy etin eksporttaý men tereń óńdeýdi damytý boıynsha keshendi sharalar qabyldaý kerek. Bul týraly Májilistiń jalpy otyrysynda depýtat Amanjol Áltaı málim etti.
- Jylqy - minsek kóligimiz, ishsek sýsynymyz, dastarhanymyzdyń berekesi, qazanymyzdyń quty edi. Ókinishke qaraı, qara bazarlar men kórshi elderge arzan baǵaǵa satýdan basqa jylqyny paıda kózine aınaldyrýdyń joly tabylmaı otyr. Balabaqshalar men mektepterdi, áskerdi, óndiris oryndaryndaǵy jumysshylardy jylqy etimen qamtamasyz etý – halyqtyń densaýlyǵyn retteýdegi asa mańyzdy qadam bolar edi. Ratsıondy ártaraptandyrýdyń (onyń ishinde ulttyq taǵamdardy engizýdiń) normatıvtik múmkindigi bolǵanymen, jylqy eti kóptegen tapsyrys berýshilerdiń úlgilik tizbeleri men satyp alý as mázirleri ádistemelerinde bekitilmegen. Jylqy etine qatysty biryńǵaı tehnıkalyq kartalar, sapa krıterııleri joq. Jylqy ónimderin tikeleı sharýadan kooperatıvtik júıede satyp alý múlde rettelmegen, - dedi A. Áltaı Premer-mınıstriniń orynbasary S. Jumanǵarınniń atyna joldaǵan saýalynda.
- Memlekettik satyp alýlardyń úlgilik tizbelerinde jáne tehnıkalyq talaptarynda jylqy etin jeke pozıtsııa retinde bekitýdi, sondaı-aq jylqy etin eksporttaý men tereń óńdeýdi damytý boıynsha keshendi sharalar qabyldaýyńyzdy suraımyn, - dedi depýtat.
Osy oraıda, joǵaryda baıandalǵandardy negizge ala otyryp, myna usynystar jasaldy:
1. Densaýlyq saqtaý jáne Oqý-aǵartý mınıstrlikterine - mektepke deıingi uıymdar, mektepter, kolledjder, medıtsına uıymdaryna arnalǵan úlgilik tizimderge jáne ádistemelik usynymdarǵa jylqy etin engizý;
2. Qorǵanys mınıstrligi, Іshki ister mınıstrligi jáne ózge de kúshtik qurylymdar azyq-túlik normalaryn túzetý múmkindigin qarastyryp, sarbazdardy jylqy etimen tamaqtandyrý múmkindigin qarastyrý;
3. Saýda mınıstrligi men pılottyq óńirlerdiń ákimdikterine - áleýmettik nysandardyń satyp alýlarynda «qyzyl ettiń» keminde 25-30%-yn jylqy etine almastyrýdy kózdeıtin 12 aılyq pılotty iske qosý;
4. Aýyl sharýashylyǵy mınıstrligine – fermer-jylqyshylardan azyq-túlik korporatsııasy arqyly tikeleı satyp alý tetigin ázirleý.
5. Memlekettik satyp alýlar jónindegi ýákiletti organǵa – jylqy etin satyp alýǵa arnalǵan úlgilik tehnıkalyq tapsyrmalardy ázirleý.
Buǵan deıin habarlanǵandaı, Premer-mınıstrdiń orynbasary — Ulttyq ekonomıka mınıstri Serik Jumanǵarın jylqy eti áleýmettik mańyzy bar taýarlardyń qataryna enýi múmkin ekenin aıtty.