Oqýshylar qysqy demalysta qansha kún demalady

ASTANA. KAZINFORM — Ekinshi toqsannyń aıaqtalýyna sanaýly kúnder qaldy. Qysqy kanıkýl kezeńi 2025 jyldyń 29 jeltoqsany men 2026 jyldyń 7 qańtaryn qosa alǵanda on kúnge sozylady. Bul týraly Oqý-aǵartý mınıstrliginiń baspasóz qyzmeti habarlaıdy.

Bıyl qazaqstandyq oqýshylar qysqy demalysta 10 kún demalady. Mınıstrliktiń málimetinshe, mektep oqýshylarynyń qysqy demalystaǵy bos ýaqytyn tıimdi ótkizý jáne jeke tulǵalyq qasıetterin damytý mańyzdy. Osy maqsatta «Adal azamat» birtutas tárbıe baǵdarlamasy aıasynda birqatar is-sharalar kózdelgen.

Balalarǵa bos ýaqytynda:

• kitap oqý;

• mýzeılerge, kórme zaldaryna, ǵylymı ortalyqtarǵa jáne tarıhı eskertkishterge tanymdyq ekskýrsııalarǵa barý;

• sporttyq oıyndarǵa qatysý, konkı, shańǵy tebý;

• qaıyrymdylyq aktsııalary jáne basqa da is-sharalarǵa qatysý usynylady.

Mektepterde, qosymsha bilim berý uıymdarynda birqatar bilim berý, sporttyq, mádenı jáne shyǵarmashylyq is-sharalar ótkizý usynylady.

— Eń bastysy — balalardyń qaýipsizdigin qamtamasyz etý. Osy maqsatta ata-analarmen birge jol-kólik jaraqattarynyń aldyn alýǵa, mekteptiń ishki tártibin saqtaýǵa, balalardyń qoǵamdyq qaýipsizdigine, úıdegi órt qaýipsizdigi jáne kıberqaýipsizdikke erekshe nazar aýdarý qajet, — delingen habarlamada.

Aıta keteıik, bul is-sharalar bilim berý uıymdaryna ádistemelik usynym retinde joldanady.

Budan buryn Qyzylordanyń qaı aýdandarynda jańa mektepter men Oqýshylar saraıy salynǵanyn aıtqan edik.