Oqýshylar árbir pándi bazalyq deńgeıde meńgerýi tıis — mınıstr
ASTANA. KAZINFORM — Búgin Oqý-aǵartý mınıstri Juldyz Súleımenova aýyl ákimderiniń dıalog-platformasynyń «Áleýmettik saıasat: azamattardyń ál-aýqaty jáne adamı kapıtaldy damytý» paneldik sessııasynda mektepterde pánderdi biriktirip oqytý jónindegi usynysqa qatysty óz pikirin bildirdi.
Kezdesýde mektepterdiń ınfraqurylymy, balalardyń qaýipsizdigi, muǵalim kadrlardyń biliktiligin arttyrý, bilim men tárbıe sapasy, materıaldyq-tehnıkalyq jaraqtandyrý jónindegi bilim berý júıesine qatysty ózekti máseleler talqylandy, onyń ishinde qazirgi ýaqytta aprobatsııadan ótip jatqan memlekettik jalpyǵa mindetti bilim berý standartyndaǵy pánderdi biriktirip oqytý jónindegi másele de kóterildi.
Memleket basshysy Qasym-Jomart Toqaevtyń bastamasymen bilim salasynyń damýyna serpin bergen aýqymdy reformalardyń júzege asyrylyp jatqanyn, onyń ishinde bilim berý júıesi tehnologııalyq progreske qadam basqanyn atap ótken Juldyz Súleımenova, pánderdi biriktirip oqytý jónindegi usynysty qaıta qaraýǵa ázir ekenin aıtty.
— Memleket basshysynyń tapsyrmalaryna sáıkes bilim salasyndaǵy eń ózekti jáne basty mindet balalardyń sapaly bilim alý quqyǵyn qamtamasyz etý. Pánderdi biriktirip oqytý jónindegi usynys jan-jaqty zerdeleýdi qajet etedi dep esepteımin. Bilim júıesi tehnologııalyq progreske qadam basqan kezeńde oqýshylar árbir pándi mektepte bazalyq deńgeıde meńgerýi tıis, sondyqtan mınıstr retinde maqsattary men taqyryptary bólek bul pánderdiń árqaısysyn jeke pán retinde derbes oqytýdy qoldaımyn, — dedi oqý-aǵartý mınıstri.
Esterińizge sala keteıik, búginde Y.Altynsarın atyndaǵy Ulttyq bilim akademııasy ázirlegen jańa oqý standarty pılottyq joba retinde synaqtan ótip jatyr. Oǵan sáıkes algebra men geometrııany «Matematıka», hımııa, fızıka, bıologııa pánderin «Jaratylystaný ǵylymdary», al dúnıejúzi tarıhy men quqyq negizderin «Áleýmettik ǵylymdar» pánderine biriktirý kózdelgen bolatyn.
Mınıstrlik óskeleń urpaqtyń básekege qabiletti bolyp ósýi úshin bilim berý baǵdarlamalarynyń eńbek naryǵynyń talaptaryna sáıkes ázirleý, balalardyń sapaly bilim alý quqyǵyn qamtamasyz etý maqsatynda bul máselede pedagogıkalyq qaýymdastyqpen jáne bilim salasynyń sarapshylarymen egjeı-tegjeıli zerdeleý júrgizýge múddeli.
Aıta ketelik elde bilim salasyna jasandy ıntellektini engizý jónindegi jumys toby qurylǵan edi.