Oqýshylar arasyndaǵy respýblıkalyq sport jarysy bastaldy
ASTANA. KAZINFORM — Elimizdiń túkpir-túkpirinen jınalǵan jas sportshylardyń basyn qosqan bul saıys sáýir aıynyń 24-kúni qorytyndylanady. Bıylǵy jarysqa Qazaqstannyń 20 óńirinen 300-ge jýyq oqýshy qatysyp, ózara baq synamaqshy. bul týraly Oqý-aǵartý mınıstrligi málim etti.
Gımnazıada baǵdarlamasyna taekvando, júzý jáne jeńil atletıka sekildi sport túrleri engizilip, qatysýshylar óz sheberlikteri men daıyndyǵyn kórsetip otyr.
— Gımnazıada — tek sporttyq jarys qana emes, sonymen qatar jas urpaqty salaýatty ómir saltyna baýlıtyn, olardyń boıynda jiger, tabandylyq, tártip pen jeńiske degen qushtarlyqty qalyptastyratyn mańyzdy alań. Osyndaı iri jarystar arqyly oqýshylar tájirıbe jınaqtap, ózara dostyq qarym-qatynas ornatyp, bolashaqta úlken sportqa qadam basýǵa múmkindik alady, — delingen habarlamada.
Atalǵan dodada jattyqtyrýshylardyń eńbegi de erekshe. Olar jas sportshylardy tárbıelep, olardyń sport pen bilimdi qatar alyp júrýine baǵyt-baǵdar berip keledi. Gımnazıada-osy eńbektiń nátıjesin kórsetetin mańyzdy kezeńderdiń biri.
Aıta ketý kerek, mundaı respýblıkalyq deńgeıdegi jarystar daryndy jastardy anyqtap, olardyń kásibı turǵyda ósýine serpin beredi. Sonymen qatar, el sportynyń damýyna úles qosatyn bolashaq chempıondardyń qalyptasýyna jol ashady.
Al byltyr Qazaqstan oqýshylary ISF U-15 Jazǵy gımnazıadasynda rekord ornatqan bolatyn.
