Oqýshylar arasyndaǵy respýblıkalyq pikirsaıys týrnıriniń jeńimpazdary marapattaldy

ASTANA. KAZINFORM – Astana qalasynda Oqýshylar arasyndaǵy respýblıkalyq pikirsaıys týrnıri ótti. Bıyl atalǵan týrnırge qalalyq jáne oblystyq kezeńderden jeńimpaz bolyp tanylǵan 180 oqýshy qatysty, dep málimdedi Oqý-aǵartý mınıstrliginiń baspasóz qyzmeti.

Ár óńirden qazaq, aǵylshyn, orys lıgalary boıynsha 9 adam joldama aldy. Týrnır pikirsaıystyń Dúnıejúzilik mektep formaty (WSDC) boıynsha ótti. Qatysýshylar irikteý jáne qorytyndy oıyndarda baq synasty.

Mınıstr Ǵanı Beısembaev kóshbasshylyq qabilet pen synı oılaýdy qalyptastyrýda pikirsaıystyń alatyn orny erekshe ekenin atap ótti. Onyń aıtýynsha, jyl saıyn debattyq qozǵalystarǵa qyzyǵýshylyq bildiretin balalardyń sany da artyp keledi. Bıyl óńirlik kezeńge 81 myńnan astam oqýshy qatysty, bul ótken jylǵy qatysýshylar sanynan 30 myńǵa artyq.

«Pikirsaıys – tek jarys alańy ǵana emes, bul óz oıyn erkin bildirýdiń, pikir almasýdyń tamasha quraly. Sizder óz bilimderińizdi dáleldep qana qoımaı, sondaı-aq komandada jumys jasaý, ózgelerdiń pikirine qulaq qoıý, mámilege kelý sekildi ómirlik mańyzdy daǵdylardy meńgerdińizder. Sizderdi quttyqtaı otyryp, osy alańda alǵan tájirıbelerińiz aldaǵy ýaqytta bıik maqsatqa umtylýlaryńyzdyń alǵysharty bolsyn dep tileımin», - dep atap ótti mınıstr.

Eki kúnge sozylǵan baıqaý nátıjesinde ІІІ orynǵa Aqtóbe, Qaraǵandy oblystary taban tiredi. ІІ oryndy Almaty oblysy, Shymkent jáne Almaty qalalary bólisti. Al І orynǵa Astana, Almaty qalalary men Qaraǵandy oblysy laıyq dep tanyldy.

«Úzdik spıker» nomınatsııasy: Alıhan Aıtbaev – Astana q., Aıajan Oljageldi – Qaraǵandy oblysy, Dana Aıtkalıeva - Abaı oblysy. 
«Úzdik orator» nomınatsııasy: Jibek Mels – Almaty q., Sofıa Malysheva – Pavlodar oblysy, Kamshat Erkinbek – Jetisý oblysy.

Qazirgi ýaqytta elimizde 7684 pikirsaıys klýby jumys isteıdi, onyń 6963-i mektep klýbtary.