Synypta qansha oqýshy JRVI juqtyrsa, qashyqtan oqytýǵa kóshedi
ASTANA. KAZINFORM — Jambyl oblysynyń sanıtarııalyq-epıdemıologııalyq baqylaý mamandary mektep oqýshylary arasynda maýsymdyq ınfektsııalardyń taralýyn tejeý sharalaryn túsindirdi. Shekteý sharalary synyptaǵy naýqas oqýshylardyń úlesine baılanysty engiziledi.
Oblystyń sanıtarııalyq-epıdemıologııalyq baqylaý departamentiniń málimetinshe, kúz jáne qys mezgilinde tumaý men jedel respıratorlyq vırýstyq ınfektsııalar (JRVI) kóbeıedi. Aýyrǵan oqýshylarǵa aınalasyndaǵylarǵa juqtyrmas úshin úıde qalý jáne ınfektsııanyń alǵashqy belgileri baıqalǵan kezde dárigerge qaralý usynylady.
Mektepterdegi is-qımyl tártibi Qazaqstan Respýblıkasynyń Bas memlekettik sanıtarııalyq dárigeriniń 2026 jylǵy 26 tamyzdaǵy № 11-PGSV qaýlysymen 2026–2027 jyldardaǵy epıdemıologııalyq maýsymǵa belgilengen.
Qujattyń 3-tarmaǵyna sáıkes, mektepter oqýshylardyń sabaqqa qatysýyn kún saıyn baqylap, sabaqqa kelmeý sebepterin anyqtap, «tańerteńgi súzgi» júrgizýi tıis. Infektsııa belgileri bar balalar sabaqtan shettetiledi. Eger oqýshy sabaq kezinde aýyryp qalsa, ata-anasy kelgenge deıin oqshaýlanady.
JRVI men tumaý boıynsha aýrýshańdyq ósken kezeńde qosymsha shekteý sharalary engiziledi.
Eger bir synyptaǵy oqýshylardyń 20-30 paıyzy JRVI-men aýyrsa, olarmen baılanysta bolǵan oqýshylar 7 kúntizbelik kún boıy medıtsınalyq baqylaýda bolady. Sonymen qatar oqý kúni ishinde oqýshylardyń bir kabınetten ekinshisine aýysýyna shekteý qoıylady.
Mundaı synypqa jańa oqýshylardy qabyldaýǵa sońǵy naýqas anyqtalǵannan keıingi ınkýbatsııalyq kezeń aıaqtalǵanǵa deıin tyıym salynady.
Al eger aýyryp qalǵan oqýshylardyń úlesi synyptaǵy jalpy oqýshy sanynyń 30 paıyzyna nemese odan da kóp bolsa, synyp qashyqtan oqytý formatyna kóshiriledi.
Mysaly, synypta 30 oqýshy bolsa, qashyqtan oqytýǵa kóshirý úshin keminde 9 oqýshynyń JRVI-men aýyrýy jetkilikti.
Aıta keteıik, Qazaqstanda maýsymdyq tumaýǵa qarsy vaktsınatsııalaý naýqany bastaldy. Halyqty tegin vaktsınatsııalaý úshin 2,1 mln doza vaktsına satyp alyndy.
