Oqýshylar arasynda qarjylyq saýattylyq boıynsha olımpıada jeńimpazdary anyqtaldy
ASTANA. KAZINFORM - 2026 jylǵy 2-6 mamyr aralyǵynda Astana qalasynda 9-11 (12) synyp oqýshylaryna arnalǵan qarjylyq saýattylyq jáne qaýipsizdik boıynsha respýblıkalyq olımpıadanyń qorytyndy kezeńi ótti.
Іrikteý kezeńine elimizdiń barlyq óńirinen 46 myńnan astam oqýshy qatysty. Onyń nátıjesinde joǵary bilim deńgeıi men quzyrettilikterin kórsetken eń úzdik 144 qatysýshy fınalǵa joldama aldy.
Oqý-aǵartý mınıstrligi málimetinshe, olımpıada qarjylyq saýattylyq jáne qarjylyq qaýipsizdik salasynda tereń bilim, bilik jáne daǵdysy bar daryndy oqýshylardy anyqtaýǵa, sondaı-aq bilim alýshylar arasynda qarjylyq mádenıetti damytýǵa jáne nasıhattaýǵa baǵyttalǵan.
Olımpıadanyń qorytyndy kezeńi eki týrdan turdy: jazbasha jáne aýyzsha. Tapsyrmalar qatysýshylardyń qarjylyq sheshim qabyldaý kezindegi synı oılaý deńgeıin, qaýipsiz qarjylyq minez-qulyq daǵdylarynyń qalyptasýyn, sondaı-aq qarjylyq aqparat kózderimen jumys isteý qabiletterin baǵalaýǵa baǵyttaldy.
Sonymen qatar qatysýshylar qarjy quraldaryn tıimdi paıdalaný jáne qarjylyq táýekelderden qorǵaný boıynsha praktıkalyq quzyretin kórsetti.
Olımpıada qorytyndysy boıynsha 54 jeńimpaz ben júldeger anyqtaldy. I dárejeli dıplommen 11 qatysýshy, II dárejeli dıplommen 16 qatysýshy, III dárejeli dıplommen 27 qatysýshy marapattaldy. Sonymen qatar 4 qatysýshyǵa gramota tabystaldy.
Olımpıadany ótkizý oqýshylardyń qarjylyq mádenıetin arttyrýǵa, qarjylyq qaýipsizdik negizderin qalyptastyrýǵa jáne ómirlik mańyzdy sheshim qabyldaý daǵdylaryn damytýǵa yqpal etedi.
Olımpıadany Qazaqstan Oqý-aǵartý mınıstrliginiń «Daryn» respýblıkalyq ǵylymı-praktıkalyq ortalyǵy, Ulttyq Bank jáne Qarjylyq monıtorıng agenttigi birlesip uıymdastyrdy.
Qazaqstandyq oqýshylar ekologııalyq máselelerdi sheshýge arnalǵan sýasty robotyn jasaǵanyn jazǵan edik.
