Oqýshylar 85 jastaǵy ájeniń ómirin saqtap qaldy

SEMEI. KAZINFORM – Oblys ákimdiginiń málimetinshe, oqys oqıǵa Kókpektide bolǵan. Aýdan ortalyǵyndaǵy mekteptiń «Jas sarbaz» synybynyń oqýshylary «Úlkenge qurmet» aktsııasynyń aıasynda qarııalardyń aýlalaryn qardan tazartyp, úı jumysyna kómektesip júr.

Kezekti márte qolǵabys etýge shyqqan Rasýl Baqtybekov, Ertaı Aıypqazy, Erasyl Dáýithan jalǵyzbasty Felısada Arabej ájeıdiń úıine barady.

– Ájeıdiń úıine ofıtser-tárbıeshimiz Talǵat Toqtarulynyń jetekshiligimen bardyq. Biz kelgende úıdiń ishki jaryǵy qosylyp turdy. Esikti qaǵyp, qońyraý soǵyp edik, jaýap bolmady. Bul bizge kúmán týǵyzyp, kórshilerden ájeıdi sońǵy ret qashan kórgenin suradyq. Olardan qarııany sońǵy 2 kúnnen beri syrtqa shyqpaǵanyn estı sala shúǵyl áreket jasaýǵa sheshim qabyldadyq, - deıdi oqýshylardyń biri Ertaı Aıypqazy.

Kórshilermen birge terezeni syndyryp, ishke engen oqýshylar ájeıdiń es-tússiz jerde jatqanyn kóredi. Birden jedel járdem shaqyryp, dárigerler qajetti em-domyn jasaǵan. Osylaısha, oqýshylar men olardyń tárbıeshisiniń qyraǵylyǵynyń arqasynda bir adamnyń ómiri qutqaryldy.

85 jastaǵy Felısada Arabej ájeı qazir aýrýhanada em qabyldap jatyr. Aýdan ákimdigi «Jas sarbaz» synybynyń oqýshylary men jetekshisine alǵys bildirip, olardyń erligi men adamgershiligin erekshe atap ótti.

Qazir osy jas sarbazdyń erligi el aýzynda aıtylyp júr.

Abaı oblysynda qar qursaýynda qalǵan eki kólik qutqarylǵanyn jazǵan bolatynbyz.