Oqýshyǵa qol kótergen mektep kúzetshisi jumystan shettetildi
PAVLODAR. KAZINFORM - Pavlodarda jumysqa ishimdik iship kelip, 6-synyp oqýshysyn keýdesinen uryp jibergen mektep kúzetshisiniń áreketine qatysty tergeý jalǵasyp jatyr.
Mektep ákimshiligi atalǵan oqıǵa boıynsha tekserý júrgizip, beınebaqylaý kameralaryn qarap shyqty. Qaýipsizdik qyzmetkeriniń qol kótergeni rastalyp, bilim mekemesine 102, 103 qyzmetteri shaqyrylǵan.
- Oqıǵanyń mán-jaıyn anyqtaý úshin mektepke polıtsııa qyzmetkerleri men kúzet fırmasynyń ókilderi keldi. Polıtsııa qyzmetkerleri tergeý júrgizip jatyr. Balalardyń qaýipsizdigin qamtamasyz etý jónindegi baqylaýdy álsiretip alǵan mektep basshysyna tártiptik shara qoldanyldy. Al kúzet agenttiginiń basshylyǵyna mektep atynan talap aryz joldandy. Kúzetshi qyzmettik mindetterin atqarýdan bosatyldy. Bilim uıasynyń barlyq qyzmetkerimen oqýshylardyń qaýipsizdigin qamtamasyz etý máseleleri boıynsha qosymsha nusqaýlyq ótkizildi, - dep habarlady Pavlodar qalasynyń bilim berý bóliminen.
Buǵan qosa bilim berý bólimi mektep dırektorlarymen bilim berý uıymdarynda qaýipsizdik sharalaryn saqtaýdyń qajettiligi jáne oqýshylardyń densaýlyǵy men ómiriniń saqtalýyna qatysty birinshi basshylardyń jaýapkershiligi týraly shuǵyl jumys keńesin ótkizgen.
Eske sala keteıik, Pavlodardaǵy №36 mektepte ishimdikke toıyp alǵan kúzetshi oqýshyny uryp jibergen. Kámeletke tolmaǵan jasóspirim aýrýhanaǵa júgindi.