Oqýshy ólimi: Aqtóbede mektep dırektory jumystan shyǵaryldy

AQTÓBE. KAZINFORM - Qopa aýylyndaǵy oqýshy óliminen soń mektep dırektory qyzmetinen bosatyldy. Al kámeletke tolmaǵan eki kúdikti eki aıǵa qamaldy.

QR Bas prokýrorynyń tapsyrmasynan soń Aqtóbe oblysy Temir aýdany Qopa aýylyndaǵy qylmystyq oqıǵany tergeý jumysyn oblys prokýrory H.Dáýeshov jeke baqylaýyna aldy.

«QR Qylmystyq protsestik kodekstiń 128-babynyń tártibimen kámeletke tolmaǵan 2 kúdikti ustaldy. Temir aýdandyq soty 2 aı merzimge qamaýǵa alý túrindegi bultartpaý sharasyn sanktsııalady. Oqıǵa boıynsha tergep-tekserýdi Aqtóbe oblystyq polıtsııa departamentiniń jedel-tergeý toby júrgizip jatyr. Qadaǵalaýdy júzege asyrý tájirıbeli protsessýaldyq prokýrorlar tobyna júkteldi. Oblystyq prokýratýra jergilikti atqarýshy organnyń atyna Temir aýdany ákiminiń, oblystyq Bilim basqarmasy jáne aýdandyq bilim bóliminiń laýazymdy tulǵalarynyń jaýapkershiligin sheshý jóninde usynys engizdi. Búgingi kúni qadaǵalaý aktisimen Qopa aýylyndaǵy mekteptiń dırektory R.E.Qarjaýov qyzmetinen bosatyldy. Basqa málimetter tergeý múddesine qatysty jarııalanbaıdy», - dep habarlady Aqtóbe oblystyq prokýratýrasynyń baspasóz qyzmeti.

Aıta keteıik, keshe túnde Qopa aýylynda oqýshylar tóbelesip, 9 synyp oqýshysy kóz jumdy. Osy oqıǵadan soń jumys toby quryldy.