Oqýshy ólimi: Aqtóbede bas bostandyǵynan aıyrylǵandar jazasyn bostandyqta júrip óteıdi

AQTÓBE. KAZINFORM — 6 jyl 8 aıǵa bos bostandyǵynan aıyrylǵan úsh sottalýshynyń jazasy ózgertildi. Aqtóbe oblystyq apellıatsııalyq sot alqasynyń qaýlysymen sottalǵandarǵa shartty jaza taǵaıyndaldy.

Aqtóbe oblystyq sotynyń baspasóz qyzmetiniń habarlaýynsha, apellıatsııalyq shaǵym túsip, isti qylmystyq ister jónindegi sot alqasy qarady. Apellıatsııalyq shaǵymdy jábirlenýshi men onyń advokattary, sondaı-aq sottalǵan B., M., T. jáne olardyń advokattary men zańdy ókilderi túsirgen. 

— Sottalǵandardyń kámeletke tolmaǵandyǵy, kinásin moıyndaǵany, is-áreketterine ókingeni, jábirlenýshi tarappen medıatsııalyq kelisim jasalǵany jáne sottalǵandardyń jazasyn jeńildetýdi suraǵan jábirlenýshi taraptyń pikiri eskerildi. Sot alqasy shartty túrde jaza taǵaıyndaý týraly sheshim qabyldady. Qylmystyq kodekstiń 63-baby boıynsha sottalǵandar B., M., T-nyń jazalary shartty dep eseptelindi. Úkimniń qalǵan bóligi ózgerissiz qaldyryldy. Apellıatsııalyq qaýly zańdy kúshine endi, — dep habarlady Aqtóbe oblystyq sotynyń baspasóz qyzmeti.

Eske salsaq, Aqtóbe oblysy Temir aýdany Qopa aýylynda 11 jáne 10-synyp oqýshylary 9-synyp oqýshylaryn aýyl mańyndaǵy monshanyń janyna jınap, olardy uryp-soqty. Sol kezde 9-synyp oqýshysy oqıǵa ornynda kóz jumdy. 

Іs Qylmystyq kodekstiń «Densaýlyqqa qasaqana aýyr zııan keltirý», «Buzaqylyq» baptary boıynsha qozǵalyp, sottalýshy B., M. jáne T. 6 jyl 8 aıǵa bas bostandyǵynan aıyryldy. 

Buzaqylyq jasaǵany úshin úsh sottalýshyǵa 1 jyl bas bostandyǵynan shekteý jazasy taǵaıyndaldy. Bári de sol kezde Qopa aýylyndaǵy mekteptiń oqýshylary boldy.