Oqýshy mektep dárethanalaryndaǵy qaýipsizdikke arnalǵan aqyldy júıe oılap shyǵardy

ASTANA. KAZINFORM – Astana qalasyndaǵy №49 mektep-gımnazııanyń 7-synyp oqýshysy Ádilhan Rústemuly bilim berý uıymdarynda oqýshylar arasyndaǵy quqyqbuzýshylyqtyń aldyn alýǵa baǵyttalǵan jańa tehnologııalyq joba oılap tapty. Jas ónertapqysh mektep dárethanalaryna ornatýǵa bolatyn arnaıy jasandy ıntellektke negizdelgen kamera júıesin tanystyrdy, dep habarlaıdy elorda ákimdiginiń resmı saıty.

Jobanyń basty maqsaty – oqýshylar arasyndaǵy tóbeles, álimjettik sııaqty jaǵymsyz áreketterdi der kezinde anyqtap, mektep ákimshiligine jedel habarlaý. Ádilhannyń aıtýynsha, júıe únemi beınejazba jasamaıdy. Kamera tek kúmándi áreket belgileri baıqalǵan sátte ǵana avtomatty túrde iske qosylady. Sol mezette túsirilgen aqparat mekteptiń jaýapty qyzmetkerlerine birden jiberiledi.

Ónertapqyshtyń jobasyndaǵy eń mańyzdy tustardyń biri – oqýshylardyń jeke ómirine qol suqpaý máselesi. Usynylǵan kamera adamdardyń beınesin naqty kúıinde emes, arnaıy óńdeý arqyly beıneni jalpylanǵan, tanýǵa kelmeıtin pishinde kórsetedi. ıAǵnı júıe tulǵany anyqtaýǵa nemese adamnyń dene bitimin aıqyndaýǵa múmkindik bermeıdi.

Sonymen qatar, qurylǵy adam denesiniń ádep normalaryna qaıshy keletin tustaryn túsirmeıtindeı etip baǵdarlamalanǵan. Bul – balalardyń ar-namysy men jeke keńistigin saqtaýǵa baǵyttalǵan mańyzdy sheshimderdiń biri.

Jas ónertapqyshtyń jobasy búginde talqylaý kezeńinde. Bolashaqta bul bastama bilim berý uıymdarynda qaýipsiz ári zamanaýı baqylaý júıesin qalyptastyrýǵa úles qosýy múmkin.

Aıta keteıik, Qyzylordada aýyl balasy uıaly telefonǵa arnalǵan qaýipsiz júıe oılap tapty.