Elordalyq oqýshy ár adamnyń qansha sý tutynatynyn esepteıtin platforma ázirledi
ASTANA. KAZINFORM – Astana qalasyndaǵy № 91 mektep-gımnazııasynyń 10-synyp oqýshysy Jáńgir Ábýov «Sý izi» atty arnaıy platforma ázirledi. Bul júıe árbir qoldanýshyǵa óziniń qansha sý tutynatyny týraly tolyq aqparat alýǵa múmkindik beredi.
Sý resýrstary jáne ırrıgatsııa mınıstri Nurjan Nurjigitov jobanyń avtorymen jáne oǵan jetekshilik etken № 91 mektep-gımnazııasynyń pedagogterimen kezdesti.
Kezdesý qorytyndysy boıynsha «Sý resýrstarynyń aqparattyq-taldaý ortalyǵy» KEAQ pen Jáńgir Ábýovtyń ata-anasy arasynda «Sý izi» baǵdarlamasyn ázirleý boıynsha yntymaqtastyq týraly kelisimge qol qoıyldy. Qujat ınteraktıvti platformany jetildirý jáne engizý baǵytynda birlesken jumysty kózdeıdi.
«Sý izi» platformasyndaǵy esepteýler paıdalanýshylardyń kúndelikti ádetterin eskere otyryp júrgiziledi. Oǵan turmysta jáne tamaqtaný kezinde sý tutyný, sondaı-aq sý resýrstaryn janama paıdalaný kiredi. Júıe engizilgen derekterdi avtomatty túrde óńdep, sý tutynýdy azaıtýǵa jáne kúndelikti ómirde sý únemdeý tájirıbesin engizýge baǵyttalǵan jeke usynystar jasaıdy.
Jobanyń teń avtory — № 91 mektep-gımnazııasynyń 10-synyp oqýshysy Adııat Shadııar balalar arasynda sý únemdeý mádenıetin qalyptastyrýǵa baǵyttalǵan qysqametrajdy beınerolıkter serııasyn usyndy. Bul rolıkterde «Tamshy» anımatsııalyq keıipkeri sý resýrstaryn utymdy paıdalanýdyń mańyzyn qoljetimdi túrde túsindirip, turmysta sýdy únemdeýdiń qarapaıym ári tıimdi tásilderin kórsetedi.
Sý resýrstarynyń aqparattyq-taldaý ortalyǵy men oqýshynyń ata-anasy osy aqparattyq materıaldardy taratý jóninde yntymaqtastyq týraly kelisimge de qol qoıdy.
Sý resýrstary jáne ırrıgatsııa mınıstri № 91 mektep-gımnazııasy oqýshylary ázirlegen jobany joǵary baǵalap, sondaı-aq pedagogter men ata-analardyń óskeleń urpaq arasynda sý únemdeý mádenıetin qalyptastyrýdaǵy úlesin atap ótti.
— Bizdiń aldymyzda turǵan mindetterdiń biri — sýdy únemdeý men oǵan uqypty qaraýdy nasıhattaý arqyly halyqtyń sý resýrstaryna degen kózqarasyn ózgertý. 2024 jyldan bastap balalar men jastar arasynda durys ekologııalyq oılaý qalyptastyrýǵa baǵyttalǵan «Sýdy únemde — bolashaqty saqta» jobasy júzege asyrylyp keledi. Mektepterde, kolledjderde jáne joǵary oqý oryndarynda ekosaǵattar ótkizilip júr. Bul jumysqa pedagogter men ata-analardyń belsendi qatysyp otyrǵany qýantady. Ortaq kúsh-jigerdiń arqasynda qoǵamda sý resýrstaryn utymdy paıdalaný mádenıetin qalyptastyra alamyz dep oılaımyn, — dedi sý sharýashylyǵy vedomstvosy basshysy.
Eske sala keteıik, byltyr Sý resýrstary jáne ırrıgatsııa mınıstrligi Almaty qalasyndaǵy № 79 gımnazııa oqýshysy Dana Qadyrbekpen memorandým jasasqan bolatyn. Ol zamanaýı nanomaterıaldardyń kómegimen atmosferadan sý jınaýǵa arnalǵan qurylǵy ázirlegen. Jaqynda ol Venada ótken BUU forýmynda úzdik jas ónertapqyshtardyń úshtigine endi.
Aıta ketelik Qyzylordalyq oqýshy egistiktegi sý shyǵynyn azaıtatyn qondyrǵy qurastyrǵan edi.
