Oqýlyqtarǵa qatysty syndy qabyldaýymyz kerek - Sholpan Karınova
«Oqýlyq máselesine toqtalar bolsaq, el Prezıdenti bıylǵy Joldaýynda oqýlyqtardy synǵa aldy. Iá, biz búgingi kúni kórip otyrmyz, syndy qabyldaýymyz kerek. Biraq, aıta keterlik jaǵdaı jańartylǵan bilim berý mazmunyna kóshý aıasynda jyl saıyn 3-synypqa arnalǵan oqýlyq shyǵaryldy. Olar ázirlendi, saraptamadan ótip, pándik komıssııalarda qaraldy. Keıin basylyp, mektepterge jetkizildi. Endi jańartylǵan bilim mazmunyna tek 10-synyp qana kóshedi. Qazirgi ýaqytta solardyń oqýlyqtaryn ázirleý jumystary júrgizilip jatyr», - dedi vıtse-mınıstr Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, jańa oqýlyqtardy shyǵarý barysynda qatelikter jibermeý úshin birneshe shara qolǵa alynǵan.
«Birinshisi - qoǵamdyq baǵalaý. Búginde mınıstrlik portalyna barlyq oqýlyq ashyq túrde qoǵamdyq baǵalaýǵa shyǵarylǵan. Ony árbir muǵalim, kez kelgen azamat kórip, baǵalaı alady. Ekinshisi - oqýlyqtardy pándik komıssııalarda eki ret qarastyrý. Biz búgingi kúni oqýlyqtyń sapasyn retteýge baılanysty osy pándik komıssııaǵa qatysatyn múshelerdiń bilimderin jetildirýdi qolǵa almaqpyz. Odan keıin sarapshylyq jumystar júrgizetin mamandardy da oqytamyz. Shynynda oqýlyq jasaý úlken ǵylym. Sondyqtan sarapshylar da, avtorlar da bólek oqytýdy qajet etedi. Búgingi kúni osy jumysty qolǵa alýdy josparlap otyrmyz», - dedi Sh.Karınova.
