Oqýlyqtarda tóńkeristi dáripteıtin orys dekabrısteriniń óleńderi órip júr - Myrzataı Joldasbekov
ASTANA. QazAqparat - Qoǵam qaıratkeri, ǵalym, jazýshy Myrzataı Joldasbekov mektep oqýlyqtarynda qazaq aqyndarynan góri, orys dekabrısteriniń tóńkerisshil uran sózderi basym bolǵanyna renishin bildirdi.
"Ústeldiń ústinde shóberemniń kitaby jatyr eken, "Rýskaıa lıteratýra" deıdi, 8-synypqa arnalǵan. Men bilmeımin, qandaı adam bekitken bul oqýlyqty. Jáne "Mektep" baspasy shyǵarǵan. Іshi tolǵan bylyq. Baıaǵy dekabrıster, Ryleevtiń óleńi júr, Prızyvy k sverjenııý vlastı... Biz sony oqytýymyz kerek pe? Máselen, myna balalardan surasam, Muqaǵalıdi bilmeıdi. Muqaǵalı meniń úsh baqytym bar deıdi. Birinshi baqytym - ol meniń ultym, ekinshi baqytym - tilim, úshinshi baqytym - Otanym! Óleńderin oqysańyzdar, tutas ulttyń qundylyqtaryn quryp otyr", - dep atap ótti ǵalym búgin "Nur Otan" partııasy janyndaǵy "Mıras" respýblıkalyq keńesiniń otyrysynda.
Onyń aıtýynsha, osy turǵyda Elbasynyń «Bolashaqqa baǵdar: rýhanı jańǵyrý» atty maqalasy aıasynda ult múddesine saı keletin keleli máselelerdi atqarý mańyzdy.
"Men endi oılaımyn, Elbasymyz bizge osyndaı tapsyrma berip otyr, mursat berip otyr, barlyǵymyz endi bar kúshimizdi salyp, osy rýhanı jańǵyrý maqalasyndaǵy aıtylǵan máselelerdiń barlyǵyn júzege asyrýymyz kerek. "Týǵan jer" baǵdarlamasy bárimizdiń kókeıimizde boldy. Bárińiz mektepte oqydyńyzdar, Sizge óz týǵan aýylyńyzdyń qasyndaǵy tóbeniń ózin oqytqan joq, qaıdaǵy bir Bangladeshtegi, Afrıkadaǵy ózendi, Jerdiń túbindegi adam bilmeıtin Amerıkadaǵy aýyldardy oqytty. Biz endi "Týǵan jer" baǵdarlamasy arqyly osyny qolǵa alýymyz kerek, óıtpesek biz qandaı patrıot daıyndaımyz?! Ultqa janyn salatyn adamdardy daıyndaý úshin aldymen týǵan jerin súıýi kerek, ultyn súıýi kerek, óziniń týǵan halqynyń tarıhyn bilýi kerek jáne onyń ádet-ǵurpyn, saltyn saqtaýy kerek dep oılaımyn", - dep túıdi sózin M.Joldasbekov.
