Oqýlyqtar tsıfrly formatqa kóshirilip jatyr - Ashat Aımaǵambetov

ASTANA. QazAqparat – Pánderdi oqytýdyń ınnovatsııalyq ádisteri engizilip, qajetti oqý materıaldary tsıfrly formatqa aýystyrylady. Bul týraly Prezıdenttiń saılaýaldy baǵdarlamasyndaǵy tarmaqtarǵa toqtalǵan oqý-aǵartý mınıstri Ashat Aımaǵambetov áleýmettik jelidegi paraqshasynda jazdy, dep habarlaıdy QazAqparat.

Oqýlyqtardy tsıfrly formatqa kóshirý jumystary júrgizilip jatyr. Balalar tsıfrly sabaqtar, jattyǵýlar men tapsyrmalarǵa qosymsha qol jetkizip, mektepte dástúrli baspa oqýlyqtaryn paıdalanýǵa múmkindik alady. Oqýlyqtar úırenshikti dástúrli qaǵaz jáne tsıfrly formatta qoljetimdi bolady

, - dep jazǵan vedomstvo basshysy.

Sonymen qatar, 2023 jyldan bastap «Jaıly mektep» ulttyq jobasy aıasynda oqytýǵa qolaıly jaǵdaılary bar 1,5 mln oqýshy orny beriledi.

Jańa jaıly mektepter men qazirgi salynyp jatqan mektepterdiń tujyrymdamalyq aıyrmashylyqtary – qurylystyń biryńǵaı standartynyń saqtalýy, zamanaýı pán kabınetterimen jáne zerthanalarmen tolyq jabdyqtalýy, 1-4-synyp oqýshylary men 5-11-synyp oqýshylary úshin bólek bloktardyń bolýy, qurylys jáne árleý materıaldarynyń sapasy joǵary bolýynda jáne t.b. Oqýshylardyń sanyn eskere otyryp, kóbirek sport zaldary ashylady. Qyzdar men uldardy eńbekke tárbıeleý úshin ár mektepte arnaıy sheberhanalar qarastyrylady

, - deıdi Ashat Aımaǵambetov.

Mınıstr 1,5 mln oryn salý – birtindep bir aýysymdy oqý formatyna kóshýge de jol ashatyn ıgi bastama ekenin de atap ótken.

Buǵan deıin sábılerdi 2 jastan bastap balabaqshamen qamtý mindeti bekitilgeni habarlanǵan bolatyn.

Sondaı-aq, turmysy tómen otbasylardyń balalary balabaqshada tegin tamaqpen qamtylatyny málim boldy. Mınıstrdiń aıtýynsha, barlyq bastaýysh synyp oqýshylary da tegin ystyq tamaqpen qamtylady.

Ashyq kózderden alynǵan foto