Oqýlyqtaǵy sapasyz olqylyqtardy joıý úshin «Oqýlyq» atty baǵdarlama ázirlenýi kerek - Q. Sultanov

Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Qýanysh Sultanov osylaı málim etti.

«Táýelsiz memlekettigimizge 20 jyl bolyp, bir urpaq ósip shyqsa da, Úkimettiń ýaqyt suranysyna jetkize almaı júrgen asa mańyzdy máselesi - mektep oqýshylaryna arnalǵan oqýlyqtar sapasy. Bul týraly 20 jyl boıyna damylsyz aıtylyp keledi. Jaı aıtylyp júrgen joq, qoǵam, ata-analar tarapynan, BAQ-da qatań syn taldaýymen tolassyz kóterilip keledi. Ásirese bastaýysh synyptarǵa arnalǵan tanymdyq oqýlyqtar, orta, joǵarǵy synyptarǵa arnalǵan tarıh, ádebıet, dúnıetanym taǵy basqa oqýlyqtar mazmuny jaǵynan bala, jasóspirim óskin úshin túsiniksiz, tartymsyz, darynsyz jazylǵany týraly shaǵym, aryzdar da jetkilikti. Olardyń kópshiligi balany oqýǵa yntalandyrmaıdy, qyzyqtyrmaıdy. Elbasy N.Á.Nazarbaev aldaǵy 20 jylǵa strategııalyq damýymyzdyń negizgi baǵyttaryn belgilep berdi. Sol baǵyttardyń talabyna búgingi oqýlyqtar saı kele me? Oǵan naqty saraptama jasaldy ma? «Nazarbaev-Ýnıversıteti» de, Nazarbaev ıntellektýaldyq mektepteriniń jańa baǵdarlamalary oqýlyqtarmen tolyq jasaqtaldy ma? Elbasy sondaı-aq bolashaq urpaqty - qazaq, orys, aǵylshyn tilderinde oqytýdy mindettedi. Sol oqýlyqtardyń mazmuny qandaı?», degen saýaldardy alǵa tartty senator.

Buǵan oraı, depýtat bir mysaldy da keltirdi. Onyń aıtýynsha, elimizdiń mektepterine usynylǵan 6-synypqa arnalǵan aǵylshyn tili oqýlyǵynda naǵyz ospadarsyz qate ketken. Bilim mınıstrligi bekitken «Atamura» baspasynan 2006 jyly shyqqan «English» oqýlyǵynyń avtorlary T.Aıapova, Z.Ábildaeva. «Osy oqýlyq ishinde Reseıge tán mysaldar - adam, jer attary qaptap júr. Eń qııanaty - «Bolashaq» degen taraýda, 121 bette Eýropa, Azııa, Afrıka kartasy berilgen. Onda Qazaqstan memleketi atymen joq. Reseıdiń quramyna kirip ketken. Osyndaı oqýlyqty mınıstrlik ekinshi basylymmen taratqan. Bul ne? Kitap avtorlary mundaı kartany qaı ǵasyrdan alǵan? Nemese Mınıstrliktiń biliksizdigi, bilimsizdigi me? Qoljazbany qabyldaýǵa nemquraılylyq pa? Joq álde, bolashaqqa jastardy osylaı óz Otanynsyz daıyndaý ma? Mundaı ospadarlyq úshin kim jaýap berýi tıis? Osy jaǵdaılardy eskere otyryp, Úkimet Prezıdent Joldaýyna sáıkes arnaıy «Oqýlyq» atty jańa baǵdarlama jasaýy oryndy bolar edi», dedi senator. Onyń aıtýynsha, elimizdegi barlyq oqýlyqtar túgeldeı derlik óte joǵary dárejedegi mamandar toptarynyń saraptamasynan ótýi tıis. Oqýlyqtarǵa baılanysty tenderler túgeldeı arnaıy baqylaýǵa alynýy qajet. Budan bólek, oqýlyq jazatyn adamdar shyǵarmashylyq toptarǵa uıymdastyrylyp, arnaıy attestatsııadan ótkizilýi shart. «Olar ásirese gýmanıtarlyq, adamnyń rýhanı sanasy men dúnıetanymyn qalyptastyryp, sondaı-aq jańa tehnologııalarǵa jol ashatyn pánderdi qatań saraptama súzgisinen ótkizip, Prezıdent aıtqan «Bolashaqtyń irgesin birge qalaımyz» Joldaýyna beıimdeý isin júzege asyrý menińshe kezek kúttirmes memlekettik mańyzdy mindet», - dedi Q. Sultanov.