Oqýlyqtaǵy qateler úshin korrektorlardyń jaýapkershiligin arttyrý usynyldy

NUR-SULTAN. QazAqparat - Mektep oqýlyqtaryna kezdesetin qatelikterdi boldyrmaý jolynda korrektorlardyń jaýapkershiligin arttyrý máselesi kóterildi, dep habarlaıdy QazAqparat tilshisi.

«Korrektorlar oqýlyqta qate ketpeýin qadaǵalaǵany úshin eńbekaqy alady. ıAǵnı, kitaptyń saýatty shyǵýyna jaýapty jáne olardyń aty-jóni kórsetilip turady. Búginde jańa shyqqan kitapty qabyldaýdyń 9 krıterııi bar. Sonyń biri oqýlyqta qate jazylǵan jáne basylǵan sózderdiń kezdesýi. Oǵan eń joǵary 4 ball beriledi, 10 qatege deıin 3 ball, 20 qatege deıin 1 ball al odan qate kóp bolsa 0 ball. Endigi meniń usynysym dál osy krıterıdi korrektorlardyń jumysyn baǵalaý kezinde de paıdalansa», - dedi Pedagogıkalyq ǵylymdar akademııasynyń prezıdenti, akademık Asqarbek Qusaıynov.

Onyń aıtýynsha, korrektorlardyń eńbek kelisimshartyna ózgeris engizý kerek.

«Eger korrektor oqýlyqta qate jiberse, jibergen qatesiniń kólemine qaraı onyń eńbekaqysynan ustaý qajet. Bul korrektorlardy jazalaý degen sóz emes, kerisinshe olardyń jaýapkershiligin arttyrý. Sebebi oqýlyqta ketetin qatelikterge mınıstrlik te, baspa ortalyǵy da emes onyń saýattylyǵyn tekseretin korrektor mamany jaýapty. Mysaly, entsıklopedııalyq týyndylardyń tili aýyr, biraq olarda qate bolmaıdy. Óıtkeni, onda korrektorlarmen qatar sarapshy mamandar bar, olar bastan aıaq qarap tekseredi jáne sol úshin eńbekaqy alady. Sonda ǵana saýatty oqýlyq protsesi durys jolǵa qoıylady», - dedi ol.

Aıta keteıik, búgin QR Bilim jáne ǵylym mınıstrliginde oqýlyqtardyń sapasy men mazmuny máselelerine arnalǵan jıyn ótti. Onda mınıstr A. Aımaǵambetov mektep oqýlyqtaryn ázirleýde biryńǵaı talap engizilgenin málim etti.