Oqýlyq jazý salasynda keńestik ıdeologııadan arylǵanymyzǵa kóp boldy - B. Aıaǵan
ASTANA. 25 qyrkúıek. QazAqparat - Elimizdegi Qazaqstan tarıhy boıynsha qazirgi oqýlyqtar jaqsy. Keremetteı bir syn saǵaty týyp tur dep aıta almaımyn.
Bul pikirin búgin Astanada Qazaqstan tarıhy boıynsha oqý josparyna, oqýlyqtar men oqý quraldaryna taldaý júrgizý men saraptama jasaý jónindegi jumys tobynyń kezekti májilisinde atalǵan jumys tobynyń tóraǵasy, Memleket tarıhy ınstıtýtynyń dırektory Búrkitbaı Aıaǵan bildirdi.
«Elimizdegi Qazaqstan tarıhy boıynsha qazirgi oqýlyqtar jaqsy. Keremetteı bir syn saǵaty týyp tur dep aıta almaımyn.
Degenmen, máseleniń máni jańasha jazylǵan, jańasha negizdelgen, jańa metodologııamen shyǵarylǵan kitaptar daıyndaýda. Sondyqtan, Bilim jáne ǵylym mınıstrliginiń tarıhshy ǵalymdardy jınaýdaǵy negizgi maqsaty jańa oı izdeý, jańa oqýlyqtarǵa jol ashý», - dedi ol.
Onyń aıtýynsha, Keńes odaǵy ydyraǵan soń, qazaqstandyq tarıhshylar qyrýar sharýa atqardy, bútindeı bir tarıhty oqytýdyń júıesi jasaldy. Ár synyptarǵa beıimdelip jazylǵan ártúrli avtorlardyń kitaptary shyǵaryldy.
«Jalpy biz oqýlyq jazý salasynda keńestik ıdeologııadan arylǵanymyzǵa kóp boldy. Tipti 90-jyldary Manash Qozybaev, Keńes Nurpeıisov, Sáken Joldasbekov jáne basqa da ǵalymdarymyz jazǵan oqýlyqtardyń ózi zamanǵa sáıkes dep aıta alamyn.
Degenmen qazir tehnologııa ózgerdi. Burynǵydaı taqtaǵa bormen jazý qalyp barady. Aqparat kózderi kóbeıdi. Álemdik úderisterdiń yqpaly artty. Elimizdi syrt aınalyp ótpeıtin dinı, ekonomıkalyq, saıası ózgerister bar. Solardyń barlyǵyn qamtıtyn, solardyń barlyǵyna jaýap beretindeı deńgeıde muǵalimder daıyndaý kerek», - dedi professor B. Aıaǵan.
Aıta keteıik, jumys toby QR Bilim jáne ǵylym mınıstrliginiń bastamasymen Memleket basshysynyń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty maqalasynda berilgen tapsyrmalardy oryndaý maqsatynda qurylǵan bolatyn. Top quramynda Qazaqstannyń kórnekti ǵalym-tarıhshylary, joǵary jáne arnaıy orta oqý oryndarynyń oqytýshylary, mektep muǵalimderi bar.
Otyrysta zamanaýı bilim talaptaryna saı Qazaqstan tarıhy boıynsha oqýlyqtardy ázirleýdiń kókeıkesti máseleleri talqylandy.
