Oqýlyq tapshylyǵy tóńireginde problemalar shash etekten - M. Aısına
ASTANA. QazAqparat - Búgin QR Parlamenti Májilisiniń jalpy otyrysynda depýtat Maıra Aısına oqýshylarǵa arnalǵan oqýlyqtar tapshylyǵyna baılanysty másele kóterip, Úkimet basshysyna saýal joldady.
«Jyl saıyn oqý ádebıetin satyp alýǵa bıýdjetten qomaqty qarajat bólinedi. Máselen, aǵymdaǵy jyly oqýlyq pen oqý-ádistemelik keshenine tapsyrys úshin 8,5 mlrd teńge qaralǵan. Alaıda, óńirlerde saılaýshylarmen kezdesýde balalardyń oqý ádebıetimen tegin, sonymen qatar, aqyly túrde tolyq jáne óz ýaqytynda qamtamasyz etilmeý problemasy únemi kóterilip keledi», - deıdi depýtat.
Onyń aıtýynsha, oqýlyqtyń jetispeýshiligi saldarynan bazarlarda týra sol oqýlyqtardyń kóshirmeleri de paıda bolǵan. Olardyń baǵasy tupnusqalyqpen salystyrǵanda birshama tómen, sapasy da syn kótermeıdi. Sonymen qatar, ata-analar da mektepte oqýlyqtardyń tek 5-6 jıyntyǵy kelip túsetinin aıtyp shaǵymdanǵan.
«Oqýlyq máselesindegi qorlandyrý úderisi de túsiniksiz, ashyq emes. Mektep kitaphanasynda balalar kitaptaryn jeńildikpen alatyn sanaty tegin oqýlyqtarmen qamtylsa, qalǵan oqýshylardy qamtamasyz etý múmkindikke qaraı uıymdastyrylady. Al oqýlyqtar jetispegenderi ony kitap úkenderinen satyp alady. Alaıda, qajetti oqýlyqtardy satyp alý barysynda da problemalar shash etekten. Zańdy túrde oqýlyqtardy satyp alý kólemderin josparlaý qaǵıdattarynyń, oqýlyqtardy qorlandyrý tetiginiń durys jolǵa qoıylmaǵany kórinip tur. Qolda bar kitaptardy qaıta bólý tetikteri, oqýlyqtardy kitaphanalar men kitap dúkenderine jetkizý kestelerinde suraq kóp. Josparlaý kezindegi kóshi-qon úderisterin boljaý jumysy da nashar», - deıdi depýtat.
Onyń sózine qaraǵanda, oblystar bólinisindegi sońǵy úsh jylda oqýlyqtar men oqý-ádistemelik keshenderdi basyp shyǵarý jáne satyp alýǵa bólinetin qarjat kólemi, 1-11 synyp keshenderiniń sany, oqýshylardyń oqý ádebıetterimen naqty qamtamasyz etilýi, tapsyrys boıynsha alynǵan oqýlyqtardy aımaqtaǵy mektepterge jetkizý týraly tolyq aqparat joq bolyp otyr.
Depýtattyq saýalǵa Májilis vıtse-spıkeri Darıǵa Nazarbaeva bastaǵan bir top halyq qalaýlylary qol qoıǵan.
