Oqýlyq satyp alýǵa qatysty jurtty dúrliktirýge ata-analardyń ózderi kináli - BǴM
ASTANA. QazAqparat - Mektepterde oqýlyq satyp alýǵa qatysty jurttyń dúrligýin týdyrýǵa ata-analardyń ózderi kináli. Osyǵan baılanysty, búgin Ortalyq kommýnıkatsııalar qyzmetinde ótken brıfıngte QR Bilim jáne ǵylym mınıstrligi Bilim berý jáne ǵylym salasyndaǵy baqylaý komıtetiniń tóraǵasy Saıat Núsipov ata-analarǵa oqýlyqtardy erterek satyp alýǵa keńes beredi. Brıfıngte óńirlerdegi mektepterdiń oqý jylyna daıyndyǵy týraly másele qaralǵan bolatyn.
Komıtet basshysy brıfıng barysynda oqýlyqtardyń qorlandyrý tsıklyna sáıkes jańartylatynyn eske salyp ótti. Onyń sózine qaraǵanda, bir oqýlyq tórt jylda bir ret jańarady. «Sosyn úsh-tórt jyl barysynda oqýlyq eskirip, onyń sapasy ata-analardy qanaǵattandyrmaıdy. Sondyqtan da ata-analar balalarynyń jańa oqýlyqpen oqyǵanyn qalaıtyn shyǵar. Bunda da ata-analardyń psıhologııasyna kóp nárse baılanysty. Óıtkeni, «qys shanany jaz saıla» degen qaǵıdatty qaperge ala bermeımiz. Sosyn jazǵy demalysta bosańsyp júrip, tek tamyzdyń 31-i men qyrkúıektiń 1-ine qaraı japatarmaǵaı júgiremiz, sonyń saldarynan uzynsonar kezekter qalyptasady, jurt dúrligedi», - deıdi S.Núsipov.
Osyǵan baılanysty komıtet basshysy jergilikti basqarmalarǵa ata-analardy oqýlyqtar tizimi týraly erterek eskertý jóninde tapsyrma bergen. Budan bólek, ondaı dúrligýdi týdyrmas úshin bıyl kitaphanalardaǵy oqýlyqtardy tamyzdyń 10-ynan bastap úılestirý boıynsha aktsııa uıymdastyrylatyn bolady.
