«Oqýlyq» ortalyǵyn Ulttyq bilim akademııasymen biriktirý qajet - Ǵ. Esim
ASTANA. Sáýirdiń 9-y. QazAqparat /Qanat Mámetqazyuly/ - Elimizdegi «Oqýlyq» ortalyǵyn Ulttyq bilim akademııasymen biriktirý qajet.
Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Ǵarıfolla Esim osylaı málim etti, dep habarlaıdy QazAqparat.
«Sońǵy jyldary orta mekteptiń oqýlyqtary, olardyń sapasy týraly respýblıkalyq basylym betterinde synı maqalalar jıi shyǵa bastady. Jalpy jyldar boıy kóterilip kele jatqan oqýlyq sapasy jónindegi áńgimeler de, onyń aınalasynda atqarylyp jatqan is-sharalar da oqý quraldarynyń sapasyn jaqsartýǵa aıtarlyqtaı áser etpedi. Al, on eki jyldyq bilim berý júıesine kóshý kezinde oqý-ádistemelik quraldardyń asa mańyzdy bóliginiń biri «oqýlyq - qandaı bolmaq?» degen suraq bizdi tolǵandyrady. On eki jyldyq bilim júıesine bilim berýdiń árbir deńgeıleriniń arasynda sabaqtastyq bolýy qajet. Al qazirgi bizdiń jaǵdaıymyzda «Oqýlyq» ortalyǵy bir bólek, Ulttyq bilim akademııasy ózinshe bir bólek jumys atqarýda. Osynyń saldarynan oqýlyq sapasy, ulttyq tárbıeniń jaǵdaıy, bilim sapasy ońalmaı otyr», dedi senator.
Onyń aıtýynsha, 12 jyldyq bilim berý standarttaryn ázirleıtin Y. Altynsarın atyndaǵy Ulttyq bilim akademııasynyń qaraýyna oqýlyq ázirleýmen aınalysatyn ári onyń sapasyna jaýap beretin fýnktsııany berý qajet. Osyǵan oraı Ǵ. Esim birqatar ortalyqtardy, onyń ishinde «Oqýlyq» ortalyǵyn Ulttyq bilim akademııasymen biriktirý qajettigin, ony atyna saı jandandyrý kerektigin alǵa tartty. «Іlgeri ýaqytta bul solaı bolǵan, onyń ústine birqatar TMD elderinde álgindeı tájirıbe áli de bar. Osylaı biriktirgende ǵana bilimniń mazmuny men oǵan qoıylatyn talap jáne oqýlyq sapasyn jetildirýdegi jumys bir baǵytta jáne júıeli túrde júredi dep esepteımin. Bul másele, ásirese Elbasynyń Qazaqstan halqyna Joldaýynda aıtylǵan 2020 jylǵa qarata on eki jyldyq oqý júıesine ótý úrdisiniń sapalyq júrýine basty kepildiń biri bolmaq», dedi senator.
