Oqýlyqtardaǵy qajetsiz taqyryptardy qysqartý kerek — Asqar Jumadildaev
ASTANA. KAZINFORM — Mektep oqýlyqtaryndaǵy oqý materıaldaryn qaıta qarap, oqýshyǵa qajetsiz taqyryptardy qysqartý kerek. Bul týraly ǵalym-matematık, memleket jáne qoǵam qaıratkeri Asqar Jumadildaev Astanada ótip jatqan Tamyz konferentsııasy kýlýarynda aıtty.
Ǵalym bilim berý júıesine jasandy ıntellektini engizý máselesine de toqtaldy jáne JI qoldanýdyń artyqshylyqtarymen qatar, keri áseri de bolýy múmkin ekenin atap ótti.
— Jasandy ıntellekt bizge kerek. Alaıda onyń jaman jaqtary da bar. Qazir balalar úı tapsyrmasyn oryndamaıdy, esep shyǵarmaıdy, shyǵarma jazbaıdy, kitap oqymaıdy. Tapsyrma berseńiz, ony jasandy ıntellektige berip, daıyn jaýabyn kóshirip bere salady. Bul durys emes. Osyǵan qarsy shara tabýymyz kerek, — dedi Asqar Jumadildaev tilshilerge bergen suhbatynda.
Ol mekteptegi barlyq oqýshyny birdeı mamandyqqa baǵyttaý múmkin emesin, bilim mazmunyn oqýshynyń bolashaq qajettiligine qaraı qalyptastyrý qajet ekenin aıtty.
— Jurttyń bárin matematık qyla almaısyń. Oqýshylardyń az ǵana bóligi matematıkany tereń meńgerip, osy baǵytqa barady, qalǵany basqa kásipti tańdaıdy. Sondyqtan men nazar aýdaratyn eki úlken sabaq bar. Olar — til jáne matematıka. Ekeýiniń de negizgi mindeti — qural bolý. Matematıka da — qural, til de — qural. Ókinishke qaraı, bizdiń zııaly qaýym «til — qural emes, til baı, áýezdi» degendi kóp aıtady. Bul maǵan keregi joq. Bul mamandardyń ózinen basqa eshkimge kerek emes. Eń bastysy qural dep qaraý kerek. Matematıkada da, tilde de kerek emes taqyryptar óte kóp. Onyń bárin júıege keltirý qajet, — dedi Asqar Jumadildaev.
Aıta keteıik, Astanada Prezıdent Qasym-Jomart Toqaevtyń qatysýymen pedagogterdiń Tamyz konferentsııasynyń plenarlyq otyrysy bastaldy. Oǵan elimizdiń barlyq óńirinen 600-den astam bilim salasynyń qyzmetkerleri men eńbek ardagerleri qatysty.
Qazaqstanda 2019 jyldan beri 511 jańa aýyl mektebi salynǵan.
Elimizde aýyl men qala oqýshylary arasyndaǵy bilim alshaqtyǵy 5 balǵa qysqarǵan.
Sondaı-aq oqýshylardyń minez-qulyq mádenıeti jańa KPI arqyly baǵalanady.
