Oqýlyqtaǵy «kógónis» sózi durys jazylǵan – Mınıstr

ASTANA. KAZINFORM – QR Oqý-aǵartý mınıstri Ǵanı Beısembaev qazaq tili oqýlyǵyndaǵy «kógónis» sózin oqýlyqqa kim engizgenin aıtty.

Úkimet úıinde jýrnalıst mınıstrden orystildi mektepke arnalǵan 5-synyptyń qazaq tili men ádebıeti oqýlyǵynda «kógónis» sózi jazylǵanyn, munyń qanshalyqty durys ekenin surady.

Óz kezeginde mınıstr «kógónis» sóziniń durys jazylǵanyn aıtty.

«A.Baıtursynov atyndaǵy til bilimi ınstıtýty bar. Sol jerdegi ǵalymdar qaı sózdiń qalaı jazylýyna baılanysty sheshim qabyldaıdy. Bul oqýlyq saraptamadan ótken, saraptamaǵa deıin de lıngvıstıkalyq tekserýden ótedi. Tilge qatysty oqýlyqqa enetin barlyq ózgerister tıisti memlekettik organnyń qadaǵalaýynda. Bul suraqty ınstıtýttan qosymsha suraı alamyz. Men de sarapshylar qabyldaǵan kásibı sheshimmen kelisýim qajet dep esepteımin», - dep jaýap berdi Oqý-aǵartý mınıstri.