Oqýǵa túspegen, jumysy joq: Neet sanatyndaǵy jastardyń sany 380 myńnan asty

ASTANA. KAZINFORM – Úkimet qabyrǵasynda jumyssyz jastar máseleleri kóterildi.

BAQ ókilderi Eńbek jáne halyqty áleýmettik qoldaý mınıstri Svetlana Jaqypovaǵa «Elimizde Neet sanatyndaǵy jastardyń sany qansha? Sońǵy jyldary jumyssyz jastar sany ósip bara jatyr, máseleniń aldyn alý úshin qandaı jumystar atqarylyp jatyr?» degen saýal qoıyldy. 

«Búginde Neet sanatyndaǵy jastardyń sany 380 myńnan asyp otyr. Kóbi mektep bitirgen soń oqýǵa túspegen, ne jumysy joq jastar. Qazirgi tańda biz jergilikti atqarýshy organdarmen birlesip jumys istep jatyrmyz. Bıyl mınıstrliktiń uıytqy bolýymen 7 myń azamat jumysqa turdy, — dep jaýap berdi Svetlana Jaqypova Úkimet otyrysynan keıin ótken baspasóz máslıhaty barysynda.

Sondaı-aq, mınıstr jumyssyz azamattardy eńbekpen qamtýda tyń bastamany qolǵa alyp jatqanyn aıtty. 

«Máselen, Astana qalasyndaǵy „Shapaǵat“ taǵy sol sııaqty saýda ortalyqtary mańynda 300-deı azamat tańnan keshke jeıin shoǵyrlanyp turady. Sol jerden 10 januıany Soltústik Qazaqstan oblysyna kóshirip, jumysqa ornalastyrdyq. Bul oń nátıje berip otyr. Bastamany normatıvtik-quqyqtyq jaǵynan rettep, onyń algorıtmin jergilikti atqarý organdaryna jetkizip, osyndaı sharalardy qolǵa alyp otyrmyz», — dep tolyqtyrdy vedomstvo basshysy. 

Eske sala ketsek, byltyr NEET sanatyndaǵy jastardyń áleýmettik jaǵdaıy men ál-aýqatyna turaqty monıtorıng júrgiziletini aıtylǵan edi.

Úkimettiń 2023-2029 jyldarǵa arnalǵan memlekettik jastar saıasaty tujyrymdamasy boıynsha jumyssyz jastar úlesin 3,5%-ǵa deıin tómendetý josparlanǵan bolatyn.