Oqýǵa túse almaǵan aqtóbelikter tehnıkalyq mamandyqtarǵa qujat tapsyra bastady

Bıyl 1 myńnan astam adam tegin oqýǵa túse alady, dep habarlaıdy QazAqparat tilshisi.

Aqtóbe oblysynda bıyl 31 myńnan astam adam jumyspen qamtylyp, eńbekke aralasady, bilim alyp, kásibin bastaıdy. Jospardyń 69 paıyzy oryndalǵan. «Nátıjeli jumyspen qamtý jáne jappaı kásipkerlikti damytý» baǵdarlamasyn iske asyrýǵa óńirge 4,8 mıllıard teńge bólingen bolatyn. Qarjynyń bir bóligi mektep bitirip, oqýǵa túse almaǵan jastarǵa baǵyttaldy. Bıyl 1085 adamǵa tegin kásibı bilim beriledi. Qazirgi ýaqytta 800-den astam adam qujattaryn tapsyryp, arnaıy bilim alýǵa nıet bildirdi. Al qysqa merzimdi oqytý baǵdarlamasyna 1055 adam qatysady.

«Halyqty jumyspen qamtýǵa járdemdesý - Memleket basshysynyń negizgi tapsyrmalarynyń biri. Bul baǵyttaǵy jumystardyń nátıjesi barynsha tıimdi bolýy tıis. Bólingen qarjy tolyqqandy ıgerilý kerek»,-dedi oblys ákimi Berdibek Saparbaev.

Aıta keteıik, aýyl adamdaryn kásipkerlikke oqytýǵa da qarjy bólingen. Mobıldi oqytý ortalyqtary qurylyp, Yrǵyz, Oıyl, Muǵaljar, Temir, Mártók jáne Shalqar aýdandarynda «Bastaý bıznes» jobasy iske asyrylyp jatyr. Qazirgi kezde qala jáne aýyl turǵyndary 2,1 mıllıard teńge nesıe aldy.