«Oqýǵa qushtar mektep»: Bes jylda mektep kitaphanalaryndaǵy ádebıet jańartylady

NUR-SULTAN. QazAqparat – QR Bilim jáne ǵylym mınıstrligi «Oqýlyq» ǵylymı-praktıkalyq ortalyǵynyń dırektory Ǵanı Beısembaev «Oqýǵa qushtar mektep» jobasyn tanystyrdy, dep habarlaıdy QazAqparat tilshisi.

«Búginde bizdiń zertteý boıynsha, jalpy mektep kitaphanalary qorynda 200 mln astam ádebıet bar. Onyń ishinde 38 mln – kórkem ádebıetter men merzimdi basylymdar tizimi. Deı turǵanmen, bul basylymdar sapasyna mán berer bolsaq, 80-90 jyldardyń aıaǵynda shyqqan kórkem ádebıetter, onyń 20-30 paıyzy jaramsyz ekeni anyqtalyp otyr. Soǵan baılanysty shuǵyl túrde mektep kitaphanalaryn kórkem ádebıetpen tolyqtyrý máselesi arnaıy jol kartasynda kórsetilip otyr», - dedi Ǵ. Beısembaev Ortalyq kommýnıkatsııalar qyzmetinde ótken brıfıngte.

Onyń aıtýynsha, jobany júzege asyrýǵa bes jyl ýaqyt qajet. Bes jylda barlyq mektep kitaphanalaryn kórkem ádebıetpen tolyqtyrý kózdelgen.

«Ár jyl saıyn mektep kitaphanalary 20 paıyzǵa kórkem ádebıetpen tolyǵyp otyrady. Bul tolyqtyrý tizimi tórt baǵytta jobalanyp, belgilenip otyrady, onyń ishinde birinshi kezekte otandyq klassıkterdiń úzdik týyndylary, ekinshiden qazaq tiline aýdarylǵan álem ádebıetiniń tizimi jáne zamanaýı aqyn-jazýshylardyń úzdik shyǵarmalary enedi. Sondaı-aq, túrli anyqtamalyqtar, ǵylymı-kópshilik basylymdar men oqý-ádistemelik quraldarmen jasaqtalady. Ádebıetter tizimin bekitý bes túrli irikteýden ótedi. Eń sońǵy tizimdi bekitý protsesi arnaıy jasaqtalǵan komıssııa arqyly iske asyrylady. Bul komıssııa osy mektepke kiretin bes myńǵa jýyq ataýy bar kórkem ádebıet tizimin qalyptastyrady», - dep túsindirdi Ǵ. Beısembaev.