Oqýdy jańa bitirgen jas dárigerler 221 myń teńge jalaqy alady

ASTANA. QazAqparat – Qazaqstanda JOO jańa bitirgen jas maman orta eseppen 155 621 teńge jalaqy alady. Bul týraly Qazaqstandaǵy JOO-lardyń 2022 jylǵy reıtınginde jazylǵan, dep habarlaıdy QazAqparat tilshisi.

«Bilim baǵyttary bólinisinde eń joǵary jumysqa ornalasý deńgeıi «Veterınarııa» baǵytynda ekenin kórýge bolady. Bul kórsetkish - 88 paıyz. Al eń tómen jumysqa ornalasý deńgeıi «Óner jáne gýmanıtarlyq ǵylymdar» baǵytynda», - dedi «Atameken» ulttyq kásipkerler palatasynyń basqarýshy dırektory Azamat Beısenbenov Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, eń joǵary medıandy jalaqy mólsheri «Densaýlyq saqtaý jáne áleýmettik qamsyzdandyrý» baǵytyna tıesili (221 841 teńge).

Al eń tómengi jalaqy «Aýyl sharýashylyǵy jáne bıoresýrstar» boıynsha tirkeldi. Bul baǵyttaǵy túlekterdiń medıandy jalaqysy 126 029 teńgeni qurady.

Al jalpy reıtıng boıynsha túlekterdiń medıandy jalaqysy - 155 621 teńge.

«Eń joǵary jalaqyny Almaty oblysynyń túlekteri alatyny anyqtaldy, oblys boıynsha túlekterdiń oqý bitirgennen keıingi alǵashqy jyldaǵy medıandyq jalaqysy 196 769 teńgeni quraǵan. Eń tómen jalaqy Shymkent qalasy túlekterinde – 124 895 teńge», - dedi A. Beısenbenov.

Aıta keteıik, QR Ǵylym jáne Joǵary bilim mınıstrligi eldegi JOO-lardyń 2022 jylǵy reıtıngin jarııalady.

Bul reıtıngke sáıkes, jumys berýshiler otandyq bilimge 67% qanaǵattanady.