Oqýdan – Іske: «Ákimder mektebi» jobasynyń ekinshi kezeńi bastaldy
ASTANA. KAZINFORM – Elimiz boıynsha 2 myńǵa jýyq aýyl ákimi osy joba aıasynda bilim aldy.
Tórt aı buryn bastalǵan «Ákimder mektebi» jobasynyń alǵashqy kezeńinde 600 mıllıard teńgeden asatyn 12 myń ınvestıtsııalyq joba daıyndaldy. Osy ýaqyt aralyǵynda 1 783 aýyldyq okrýgtiń ákimi oqýdan ótti. Olardyń kópshiligi memlekettik basqarý isine alǵash ret qadam basqan. Búginde alǵan bilimderin naqty iske asyryp jatyr. Jobanyń ekinshi kezeńinde ákimder aýyl turǵyndaryna kooperatıvter qurýǵa, ónim ótkizý joldaryn uıymdastyrýǵa jáne aýyl ekonomıkasyn damytýǵa qoldaý kórsetti.
Belgili bolǵandaı, Memleket basshysy Qasym-Jomart Toqaev jaqynda ótken Úkimettiń keńeıtilgen otyrysynda tikeleı saılanǵan ákimderdiń jańa sanaty – saılanbaly basqarýshylar paıda bolǵanyn atap ótti. Olardyń arasynda muǵalimder, dárigerler jáne memlekettik qyzmette tájirıbesi joq basqa da mamandar bar. Sondyqtan Prezıdent «AMANAT» partııasynyń tájirıbesin eskere otyryp, «Ákimder mektebi» oqý jobasyn iske qosýdy tapsyrdy.
2021 jyly engizilgen ákimderdi tikeleı saılaý – saıası júıeni demokratııalandyrýǵa baǵyttalǵan Prezıdenttiń mańyzdy reformalarynyń biri. Bul ózgeris azamattardyń belsendiligin arttyryp, saılanǵan ákimdermen birge aýyldaǵy túıtkildi máselelerdi sheshýge jol ashty. Keıingi tórt jylda 2 myńnan astam aýyl ákimi saılanyp, ákimder korpýsy aıtarlyqtaı jańardy. Olardyń kópshiligi – partııa músheleri, 60%-dan astamy buǵan deıin ákim bolmaǵan, memlekettik qyzmette jumys istemegen azamattar.
Sondyqtan jańa saılanǵan halyq qalaýlylaryna qoldaý kórsetý maqsatynda partııa Memlekettik qyzmet isteri agenttigimen birlesip «Ákimder mektebi» jobasyn qolǵa aldy. Tórt aıdyń ishinde 1 783 aýyl ákimi oqýyn aıaqtap, aýyl ekonomıkasynyń baǵytyn aıqyndaý, naqty tabys ákeletin salalardy anyqtaý, ónim kólemin baǵalaý syndy mańyzdy daǵdylardy meńgerdi. Joba aıasynda mamandarmen birlesip 2 184 aýyldyq okrýgte 12 myńnan asa ınvestıtsııalyq joba ázirlendi. Bul bastamalar óńdeý, kooperatsııa, ınfraqurylymdy damytý sııaqty baǵyttardy qamtyp, aýyl turǵyndarynyń tabysyn arttyrýǵa baǵyttalǵan.
– Kedeılikti azaıtý degenimiz – tek qarjy úlestirý emes, sana-sezimdi ózgertý, daǵdy berý, naqty múmkindikter ashý. Osy maqsatta partııa úsh iri jobany qatar bastady: «Qaryzsyz qoǵam» – qarjylyq saýattylyqqa baýlıdy, «Aýyl amanaty» – tabys tabý joldaryn kórsetetin naqty ádisteme, «Ákimder mektebi» – qabyldanǵan sheshimder men aýyldaǵy shynaıy ómirdiń arasyn jalǵaıtyn kópir ispetti. Bul jobanyń túlekteri tek bilim alyp qana qoımaı, jerlesterine birlesip kooperatıvter qurýǵa, aýyl ekonomıkasyn damytýǵa qoldaý kórsetip jatyr, - deıdi partııa hatshysy Eldar Jumaǵazıev.
Endi jobanyń kelesi kezeńinde ákimder aýyldyq kooperatıvter qurýǵa kiristi. Kóptegen turǵyn «Aýyl amanaty» jobasy aıasynda 2,5% jeńildikpen nesıe alyp, kásibin asha alady. Ákimder aýyl azamattaryn biriktirýge, ónim ótkizý jelilerin, logıstıkany jáne qyzmetti úılestirý júıesin jolǵa qoıýǵa kómek kórsetedi. Bul kezeń – jaı oqytý ǵana emes, naqty jobalardy júzege asyrýǵa bet buratyn tájirıbelik saty.
Partııa aýyl ákimderine qoldaý retinde kooperatsııa jónindegi arnaıy úılestirýshilerdi daıyndap, óńirlerge jiberdi. Olar aýyldardy aralap, halyqpen jáne bastamashy toptarmen kezdesip, jobalardyń iske asyrylý barysyn baqylap, qujat jınaýǵa, kooperatıvterdi ádilet organdarynda tirkeýge kómektesip júr.
Jobanyń nátıjesi retinde 300-den astam aýyl sharýashylyǵy kooperatıvin qurý josparlanyp otyr. Bul kooperatıvter jeke qosalqy sharýashylyqtardy biriktirip, aýyl sharýashylyǵy salasyn júıeli túrde damytýǵa sep bolady.
Aıta ketý kerek, buǵan deıin «AMANAT» partııasy janynan Óńirlik saıasat jónindegi Úkimettik jobalyq keńseniń Analıtıkalyq ortalyǵy qurylǵan bolatyn. Bul ortalyq «Ákimder mektebi» jobasyn iske asyrýmen, basqarý isin tsıfrlandyrýmen jáne kooperatıvtik jobalardy súıemeldeýmen aınalysady.
Eske sala ketsek, buǵan deıin «Ákimder mektebinde» aýyl jáne aýdan basshylaryna ne úıretiletinin jazǵan edik.