Oqýdan shyǵarylyp, Astanadan Aqtóbege qashqan Aýǵanstan azamattary ustaldy
AQTÓBE. KAZINFORM – Aqtóbe polıtsııasy Aýǵanstan azamattaryn jaldamaly páterden tapty. Keıin olardy Astanadaǵy polıtsııa qyzmetkerlerine jiberedi.
Aqtóbe polıtsııasy 1998, 1995, 2000, 2004, 2006 jyly týǵan Aýǵanstan azamattaryn taýyp, olardy bólimshege jetkizdi. Oqýdan shyǵyp qalǵan sheteldikter talap boıynsha eline qaıtýy tıis bolǵan.
— Polıtsııa departamentine elordanyń joǵary oqý oryndarynyń biriniń jeti stýdentin, Aýǵanstan azamattaryn izdeý týraly ótinish kelip tústi. Stýdentter oqýdan shyǵarylǵan jáne óz eline qaıtýy tıis bolǵan. Alaıda sheteldikterdiń Reseı Federatsııasyna ketýge oqtalǵany, Aqtóbe qalasynda jasyrynyp júrgeni anyqtaldy. Polıtsııa qyzmetkerleri qonaqúı, jataqhanalar men jaldamaly páterlerdi tekserdi. Júrgizilgen is-sharalardyń nátıjesinde olar jaldamaly páterlerdiń birinen tabyldy. Sheteldikter polıtsııaǵa jetkizilip, elordalyq áriptesterge beriledi, — dedi Aqtóbe oblystyq PD baspasóz qyzmetiniń jetekshisi Erbolat Sarqulov.
