Oqý jylynyń qashyqtan bastalýy epıdemıologııalyq turǵydan negizdelgen – dáriger
ALMATY. QazAqparat – Almatyda karantındik is-sharalardyń arqasynda, vırýs juqtyrǵan balalardyń sany 2,5-3%-dan aspady, dep habarlaıdy QazAqparat tilshisi.
«Negizi balalardyń jas ereksheligine qaramastan nazarda ustaý qajet. Óıtkeni, olar aýrýdy taratýda úlken ról atqarady. Patogenniń COVID-19 kontagıozy joǵary, sondyqtan vırýs juqtyrǵan balalar ózderiniń jaǵdaıynyń aýyrlyǵyna jáne aýrýdyń klınıkalyq kórinisine baılanysty úıde oqshaýlanýy nemese aýrýhanaǵa jatýy tıis.Karantındik is-sharalardyń arqasynda búgingi kúnge deıin Almatyda vırýs juqtyrǵan balalar sany 2,5-3%-dan aspady»,– deıdi Balalar qalalyq klınıkalyq juqpaly aýrýlar aýrýhanasy bas dárigerdiń emdeý isi jónindegi orynbasary Jumagúl Eshibekova.
Onyń aıtýynsha, áleýmettik ara qashyqtyq jáne gıgıenalyq sharalardyń saqtalmaýy, balalar arasynda ınfektsııa men aýrýdyń kúrt ósýine ákelip soǵýy múmkin. Sonymen qatar, maýsymdyq JRVI-diń órshýi yqtımal, bul COVID-19 vırýsymen birge aýrýdyń aǵymyn qıyndatady.
Búgingi tańda balalar arasynda COVID-19 vırýsyna qatysty 5 mańyzdy ereje belgili boldy:
1. Balalarda COVID-19 vırýsynyń klınıkalyq kórinisteri sırek kezdesedi;
2. Balalar eresektermen salystyrǵanda kóbinese sımptomsyz tasymaldaýshy bolýy múmkin ( COVID-19 vırýsy balalarda dene qyzýy, jótel, tynys alý qıyndyqtary sııaqty belgilersiz júredi);
3. Balalardyń kópshiliginde aýrý jeńil ótedi, biraq aýrýhanaǵa, sonyń ishinde reanımatsııa jáne qarqyndy terapııa bólimine jatqyzýdy qajet etetinderi de bar. Qaýip tobyna kiretinder - semizdik, qant dıabeti, ımmýn tapshylyǵy, revmatıkalyq aýrýlary bar, tynys alý joldarynyń sozylmaly aýrýlary, júrek-tamyr jáne basqa da aýrýlary bar balalar;
4. COVID-19 vırýsynan keıin balalar «tsıtokındik daýyl» júıeli qabyný reaktsııasyn damytýy múmkin, biraq, ol sırek kezdesedi.
5. Áleýmettik (fızıkalyq) qashyqtyqty jáne gıgıenalyq sharalardy saqtaý balalar arasynda aýrýdyń taralýynnyń aldyn alýǵa múmkindik beredi;
«Áleýmettik ara qashyqtyqty jáne gıgıenalyq sharalardy saqtaý arqyly balalardy kúz jáne qys mezgilinde tynys alý joldarynyń ınfektsııalary, joǵarǵy jáne tómengi tynys alý joldarynyń sozylmaly aýrýlarynan qorǵap qalýǵa bolady. Sondyqtan qashyqtan oqytý formaty epıdemıologııalyq turǵydan negizdelgen shara»,– dep qortyndylady dáriger.
