Oqý jylynyń bastalýyna oraı astanalyq polıtseıler kúsheıtilgen jumys tártibine kóshirildi

Bul týraly qalalyq Jol polıtsııasy basqarmasynan málim etti.

Sondaı-aq, 1 qyrkúıek kúni polıtseıler «Abaılańyz, balalar!» aktsııasynyń sheńberinde «Birinshi synyp oqýshylaryn jaıaý júrginshiler qataryna qabyldaý» is-sharasyn ótkizýde. Tártip saqshylary mektepterdegi saltanatty jıyndar barysynda jazǵy demalys aılarynda umytylyp qalǵan jolda júrý erejelerin oqýshylardyń esine taǵy bir márte salatyn bolady. Bul iste polıtseılerge Qýyrshaqtar teatrynyń ártisteri kómektespek. Alyp qýyrshaqtar mýltfılmderdegi súıikti keıipkerlerdiń kıimderin kıip, balalarǵa jolda júrý erejelerin túrli oıyndar arqyly túsindiredi. Jol ınspektorlary kólik júrgizýshilerine jolda júrý qaýipsizdigine qatysty paraqshalardy taratatyn bolady. Onymen birge, tańerteńnen bastap Astananyń barlyq orta bilim berý mekemeleriniń aldynda Jol patrýldik qyzmetiniń saqshylary kezekshilik etýde.

Aıta keteıik, oqý jylynyń aldynda Astana qalasynyń Jol polıtsııasy basqarmasy avtojol ýchaskelerine, aıaldamalarǵa, kólikterdiń aınalatyn alańdaryna, mektepter men mektepaldy mekemelerdiń mańyndaǵy jol belgileri men jol ústindegi syzbalarǵa tekserýler júrgizdi. 220 jol belgisi, «Abaılańyz, balalar!» jazýy bar 40 qalqan, joldardyń ústine jyldamdyqty jasandy tejeıtin kedergiler ornatyldy.