Oqý jylyn uzartýdyń nátıjeliligine monıtorıng júrgizilip jatyr

ASTANA. QazAqparat – Elimizde oqý jylyn uzartýdyń nátıjeliligi men tıimdiligine monıtorıng júrgizilip jatyr. Bul jaıynda Májilis depýtattarynyń saýalyna Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenovanyń jaýabynda aıtylǵan, dep habarlaıdy QazAqparat tilshisi.

«2022 jyly Ulttyq bilim akademııasy janyndaǵy ǵylymı-ádistemelik keńestiń sheshimimen orta bilim berý máseleleri jónindegi jumys toby quryldy. Jumys toby oqý jylynyń ońtaıly uzaqtyǵy boıynsha halyqaralyq tájirıbege taldaý júrgizdi. Jalpy oqý jylyn uzartý jónindegi sheshim Ekonomıkalyq yntymaqtastyq jáne damý uıymynyń (EYDU) standarttaryna sáıkestendirý úshin qabyldandy. EYDU elderiniń álemdik tájirıbesi kórsetkendeı, kóptegen elderdiń mektepterinde oqý jylynyń uzaqtyǵy 36 aptadan (Fınlıandııada – 38, Sıngapýrda – 39, Túrkııada – 39, Polshada – 39, Ońtústik Koreıa men Qytaıda – 42, Shveıtsarııada – 43, Germanııada 44, Danııada – 45 apta) asady. Qazirgi ýaqytta Y.Altynsarın atyndaǵy Ulttyq bilim akademııasy oqý jylynyń uzaqtyǵyn ulǵaıtýdyń nátıjeliligi men tıimdiligine monıtorıng júrgizýde», - delingen Tamara Dúısenovanyń jaýabynda.

Atap ótilgendeı, monıtorıng barysynda bilim alýshylardyń, ata-analardyń, pedagogterdiń pikirleri zerdelenedi. Onyń nátıjeleri Ulttyq bilim akademııasyndaǵy saraptamalyq keńestiń talqylaýyna usynylatyn bolady. Saraptamalyq keńestiń quramyna qoǵamdyq birlestikterdiń, ata-analar komıtetteriniń, respýblıkalyq jekemenshik mektepter qaýymdastyǵynyń, memlekettik uıymdar men vedomstvolardyń ókilderi kiredi jáne olardyń tizimi akademııanyń saıtynda jarııalanǵan.

«Saraptamalyq komıssııa músheleriniń pikirinshe, 36 aptadaǵy oqý jylynyń tıimdiligin tolyq taldaý úshin osy uzaqtyqtaǵy oqý jylyn uıymdastyrýdyń keminde eki-úsh jyly qajet. Qazirgi kezde Ulttyq bilim akademııasy oqý jylyn ulǵaıtýdyń nátıjeliligi men tıimdiligine monıtorıng júrgizýde jáne nátıjesi boıynsha tıisti sheshim qabyldanatyn bolady», - dedi mınıstr.