Oqý-jattyǵý: «Proton-M» qulaýyna baılanysty tótenshe jaǵdaı jarııalandy
KÓKShETAÝ. QazAqparat - Aqmola oblysynda «Proton-2019» respýblıkalyq oqý-jattyǵýy ótti, dep dep habarlaıdy QazAqparat tilshisi oblystyq TJD baspasóz qyzmetine silteme jasap.
Bulandy aýdanynda uıymdastyrylǵan oqý-jattyǵýda TJ joıý, TJ aımaǵyn radıatsııalyq-hımııalyq barlaýdy uıymdastyrý, zymyran otynynyń komponentterimen zalaldanǵan aýmaqtardy oqshaýlaý, beıtaraptandyrý, órt oshaqtaryn sóndirý, qıraǵan ǵımarattardyń úıindilerin arshý, zardap shekkenderdi izdeý jáne qutqarý, zardap shekkenderge shuǵyl medıtsınalyq kómek kórsetý jáne olardy emdeý mekemelerine evakýatsııalaý boıynsha praktıkalyq is-sharalar pysyqtaldy.
Ekinshi kezeńge sáıkes Aqmola oblysy TJD DJB jedel kezekshisine «Proton-M» zymyran tasyǵyshyn orbıtaǵa shyǵarý kezinde onyń Bulandy aýdanynyń aýmaǵyna shartty túrde qulaýy oryn alǵany týraly habarlama kelip tústi. 01 Qarasha 2019 jyly saǵat 09.00-de aýdandyq TJ komıssııasynyń turaqty quramy jınaldy. Komıssııa quramy belgilengen ýaqyt tártibine sáıkes keldi.
Jıynnan keıin jedel jaǵdaı jáne avarııalyq-qutqarý jáne shuǵyl jumystardy júrgizý boıynsha AQMJ aýdandyq kishi júıesiniń basqarý organdarynyn, aýdandyq TJ komıssııasy tóraǵasynyń sheshimderin tyńdaý júrgizildi. Tyńdaý barysynda dabyl berý jáne qabyldaý, TJ ornyna kúshter men quraldardy, qajetti jabdyqtardy jetkizý, zardap shekkenderge medıtsınalyq kómek kórsetý, TJ aımaǵynda qoǵamdyq tártipti saqtaýdy qamtamasyz etý boıynsha qyzmetterdiń ózara is-qımyl máselelerin pysyqtaýǵa erekshe nazar aýdaryldy.
TJ aımaǵyna jedel túrde apatty joıý boıynsha aýdannyń jedel toby, ıaǵnı, qoǵamdyq tártipti saqtaý, órtke qarsy qyzmet, medıtsınalyq qyzmet, janýarlardy qorǵaý qyzmeti keldi. Sonymen qatar oblystyq jáne aýdandyq ákimdikterde Tótenshe jaǵdaılar komıssııasynyń shuǵyl otyrysy ótkizildi.
Qoǵamdyq tártipti qorǵaý qyzmeti zymyran tasyǵyshtyń qulaý aýdanyn qorshap aldy. TJ aımaǵyna túsken aýyl turǵyndary SSQ-men jabdyqtalǵan avtokólikterdiń kómegimen qalyptasqan jaǵdaı týraly habardar etti, sondaı-aq medıtsınalyq qyzmet qyzmetkerleri zardap shekkenderge alǵashqy kómek kórsetti. Turǵyndar men janýarlar qaýipti aımaqtan evakýatsııalandy.
