Oqý-jattyǵý: Óskemen áýejaıynda koronavırýs juqtyrǵan jolaýshy anyqtaldy
ÓSKEMEN. KazAqparat - Óskemen qalasynyń áýejaıynda koronavırýs juqtyrǵan adam anyqtalǵan jaǵdaıdaǵy is-qımyldar pysyqtaldy, dep habarlaıdy QazAqparat tilshisi.
Oqý-jattyǵý stsenarııi boıynsha, dıspetcherge kelip qonǵan ushaq bortynda koronavırýsqa shaldyqqan adam bar ekendigi habarlanady. Bortqa dereý qorǵanys kostıýmin kıgen sanıtarlyq-karatındik baqylaý mamandary kóteriledi. Medıtsınalyq saýalnama kezinde sońǵy eki aptada onyń Qytaıda bolǵandyǵy, keıin Óskemenge týysynyń qalyn bilýge kelgendigi anyqtalady. Qoldan daıyndalǵan teplovızordyń kómegimen naýqastyń dene qyzýy tekserilip, artynsha juqpaly dertke shaldyqty degen kúdikpen áýejaıdyń sanıtarlyq-karantındik pýnktine jetkiziledi.
Sondaı-aq mamandar alǵashqy medıtsınalyq kómek kórsetý jáne zertteý úshin bıomaterıal alý jumystaryn júrgizdi. Odan bólek, naýqasty arnaıy kapsýlaǵa salyp, Óskemendegi juqpaly aýrýlar statsıonaryna jetkizý joly túsindirildi.
«Qysqa merzim ishinde koronavırýs birqatar memlekette taralyp, juqpaly dert bizdiń aýmaqqa da enip kete me degen úreı týdy. Sondyqtan osyndaı sharalardy jıi ótkizip turǵan jón. Búgin adam koronavırýs dertin juqtyrý jaǵdaıy týyndaǵan kezde oryndalatyn jumystar týraly oqý-jattyǵý júrgizdik», – deıdi Taýarlar men kórsetiletin qyzmetterdiń sapasy men qaýipsizdigin baqylaý departamenti sanıtarlyq-karantındik baqylaý bóliminiń bas mamany Anar Sabyrbaeva.
