Oqý-jattyǵý: Kókjaılaý shatqalyndaǵy órtti sóndirýge tikushaq jumyldyryldy
Stsenarıı boıynsha Kókjaılaý shatqalynyń ońtústik-batys betkeıinde órt shyqqan. «Qazaq ormandardy avıatsııalyq qorǵaý jáne orman sharýashylyǵyna qyzmet kórsetý bazasynyń» RMQK baqylaýshy ushqyshy tutanǵan órtti baıqap, dereý radıodıspetcherlik qyzmetke habarlady.
Tótenshe jaǵdaılar departamentiniń dıspetcherlik qyzmetiniń is-qımyl algorıtmine sáıkes, ormanshylarǵa kómek kórsetý úshin qalanyń órt sóndirý qyzmetteri men avıatsııa jiberildi.
Jeldiń ekpini saldarynan órt aýmaǵy ulǵaıyp, demalýshy týrısterge, sondaı-aq órttiń Іle Alataýy memlekettik ulttyq tabıǵı parkiniń orman alqabyna taralýyna jáne demalýshy týrısterdiń ómirine qaýip tóndi.
Órtti sóndirý úshin «Qazavıaqutqarý» AQ-nyń MI-8 tikushaǵy áýeden birneshe tonna sý tókti.
Nátıjesinde oqý-jattyǵý jumystary sátti ótti. Mamandar aldaryna qoıǵan mindetterin minsiz atqardy.
«Avıatsııany paıdalaný qol jetkizý qıyn taýly aımaqtarda órtti sóndirýde jedel den qoıýǵa múmkindik beredi. Atalǵan oqý-jattyǵýdyń maqsaty qalanyń azamattyq qorǵaý qyzmetteriniń kúshteri men quraldarynyń jumysyn pysyqtaý, sondaı-aq taýly-orman alqaptaryndaǵy órtti joıý, zardap shekkenderge medıtsınalyq kómek kórsetý, tótenshe jaǵdaı aımaǵynan zardap shekkenderdi evakýatsııalaý bolyp tabylady»,- dep atap ótti Almaty qalasy Tótenshe jaǵdaılar departamenti bastyǵynyń orynbasary Samat Asaıynov.
Oqý-jattyǵýǵa jeke quramnan 147 adam, 28 birlik tehnıka, 2 kvadrokopter, 2 áýe kemesi, 6 jylqy, 2 izdestirý ıti jumyldyryldy.
