Oqý-jattyǵý: Aqtóbedegi tótenshe aýmaqtan 3500 adam evakýatsııalandy
AQTÓBE. QazAqparat - Aqtóbe qalasynda «Qys-2017» respýblıkalyq oqý-jattyǵýy ótti. Oqý-jattyǵý kezinde Jińishke stantsııasynda kúkirt qyshqyly tógilip, halyqaralyq áýejaıǵa ushaq apatty qondy, jol-kólik oqıǵasy bolǵan jerde qutqarý jumystary júrgizildi, dep habarlaıdy QazAqparat tilshisi.
«Qys-2017» respýblıkalyq oqý-jattyǵýy bıyl Aqtóbe qalasynda ótti. Arnaıy stsenarıı boıynsha Jińishke stantsııasynda kúkirtti qyshqyl tógilip, temirjol boıynda bolǵan apatty joıý jumystaryn júrgizildi. Aldymen barlaý, evakýatsııalaý, medıtsınalyq kómek kórsetý jumystary júrdi. Keıin kúkirt qyshqylynyń tógilýi toqtatyldy. Zalalsyzdandyrý, qalpyna keltirý jumystary júrgizildi. Oqıǵa ornyna tótenshe jaǵdaılar qyzmeti, qoǵamdyq densaýlyq saqtaý departamentiniń mamandary, apattar medıtsınasy ortylyǵynyń jedel áreket etý brıgadasy, órt sóndirýshiler jedel jetti. Oqý-jattyǵý kezinde arnaıy qurylymdar ózderine júktelgen tapsyrmany tolyq oryndady.
«Qys-2017» respýblıkalyq oqý-jattyǵýy kezinde azamattyq qorǵaý qurylymdarynyń saptyq túzilimi ótti. Tártip saqshylary, shuǵyl medıtsınalyq kómek beketi, radıatsııalyq-hımııalyq baqylaý, shuǵyl áreket etý jasaǵy syndy mekemeler óz jumystaryn kórsetti.
«Bizdiń komandada 37 adam, 10 arnaıy tehnıka bar. Aqtóbe hrom qoryndylary zaýytyndaǵy jumysshylardan qurylǵan arnaıy komanda ǵımarattar qulaǵan kezde qutqarý jumystaryn júrgizýge daıyn. Arnaıy tehnıkanyń bári bar. Jylyna eki ret oqý-jattyǵý ótkizemiz. Kez kelgen ýaqytta kómek kórsetemiz»,- dedi ınjenerlik komandanyń komandıri Evgenıı Tserkovnov.
Aıta keteıik, oqý-jattyǵýǵa Іshki ister mınıstrligi, tótenshe jaǵdaılar komıteti tóraǵasynyń orynbasary Marat Kóldikov, Aqtóbe oblysynyń ákimi Berdibek Saparbaev qatysty. Barlyǵy 60-tan astam tehnıka, 200 jeke quram jasaǵy tótenshe jaǵdaı kezinde ózderine júktelgen mindetterdi oryndaýǵa ázir ekenin jetkizdi. Bıyl Aqtóbe oblysyndaǵy azamattyq qorǵaý qurylymdary tabıǵı jáne tehnogendi sıpattaǵy tótenshe jaǵdaı kezinde 680 adamdy qutqardy. Tótenshe jaǵdaılar aýmaǵynan 3500 adam evakýatsııalandy. Barlyǵy 250-den astam adam zardap shegip, olarǵa der kezinde medıtsınalyq-psıhologııalyq kómek berildi. 
