Oqý oryndarynda dástúrli jyr ónerin oqytýdy memleket qamqorlyqqa alsa - B. Smaǵul
ASTANA. 6 aqpan. QazAqparat - Birqatar óner oqý oryndarynda dástúrli jyr ónerin oqytýdy memleket óz qamqorlyǵyna alsa ıgi.
Búgin QR Parlamenti Májilisiniń jalpy otyrysynda Úkimet basshysy Serik Ahmetovtiń atyna saýal joldaǵan depýtat Baqytbek Smaǵul osylaı málim etti.
«Elbasy N. Nazarbaev «Qazaqstan-2050» strategııasynda: «Dástúr men mádenıet - ulttyń genetıkalyq kody. Biz ózimizdiń ulttyq mádenıetimiz ben dástúrlerimizdi osy áralýandyǵymen jáne ulylyǵymen qosyp qorǵaýymyz kerek, mádenı ıgiligimizdi bólshektep bolsa da jınastyrýymyz kerek» dep naqty aıtty. Egemendi qazaq eliniń álem halyqtary qaýymdastyǵy qabyldaǵan túrki tildes halyqtarymen maqsat-murattary úndesti. Alaıda, murattarymyzdy kórshi memleketter men Eýropanyń jekelegen azamattary ıÝNESKO sheńberinde talan-tarajyǵa salyp, zańdastyryp ıelene bastaǵan tusta ulttyq qundylyqtarymyz memlekettik turǵydaǵy qamqorlyqty talap etedi», - dedi depýtat. Onyń aıtýynsha, 1998 jyly Qorqyt Ata atyndaǵy ýnıversıtettiń ǵalymdar toby dástúrli óner - jyr mamandyǵynyń memlektetik standartynyń oqý josparyn, onyń tolyq oqý-ádistemelik keshenin jasap shyǵarǵan. Ol tıisti mınıstrlikterdiń buıryqtarymen bekitilip, joǵary oqý oryndaryndaǵy arnaıy mamandyq esebindegi klassıfıkatorǵa engizilgen. Nátıjesinde jyrshylyq-jyraýlyq ónerdi tutynǵan talantty jastar bul baǵytty shynaıy zerttep tanýǵa qol jetkizgen edi.
«Ókinishke qaraı, osy mamandyqqa memlekettik tapsyrystyń tym az bólinýi men aqyly oqytýdyń mólsheri shamadan tys bolýy talapker jastardy joǵary oqý ornynda oqytýǵa, maman retinde daıyndaýǵa basty kedergi bolyp tur. Osyǵan oraı, Astanadaǵy Qazaq ulttyq óner ýnıversıtetinde, Qurmanǵazy atyndaǵy Almaty ulttyq konservatorııasynda, Qorqyt Ata atyndaǵy Qyzylorda memlekettik ýnıversıtetine dástúrli jyr ónerin oqytýdy memleket óz qamqorlyǵyna alsa, arnaıy bilim granttary bólinse ıgi», - dedi B. Smaǵul.
