Oqý oryndarynyń 82 paıyzy ǵana jedel basqarý ortalyǵyna qosylǵan

ASTANA. KAZINFORM – 31 tamyz ben 9 qyrkúıek aralyǵynda «Abaılańdar-balalar!» is-sharasy ótkiziledi. Bul týraly Úkimet otyrysynda Іshki ister mınıstriniń birinshi orynbasary Baýyrjan Álenov aıtty.

– 31 tamyz ben 9 qyrkúıek aralyǵynda «Abaılańdar-balalar!» is-sharasyn ótkizemiz. Maqsaty – balalardyń joldaǵy jaraqatyn azaıtý. 1 qyrkúıekten bastap jasaqtardy oqý oryndaryna jaqyndatamyz. Barlyq mektepter men kolledjderge ýchaskelik ınspektorlar men jedel ýákilder bekitildi. Mektepterde qaýipsizdik erejeleri boıynsha sabaqtar ótkiziledi. Oqý-aǵartý mınıstrligi olardy ótkizýge járdem kórsetý qajet, - dedi mınıstr orynbasary.

Onyń atap ótýinshe, bıyl antıterrorlyq qorǵalý talaptaryna sáıkestigi bóliginde 1 773 nysan tekserildi. 800-den astam buzýshylyq anyqtaldy. 141 basshy jaýapkershilikke tartyldy. Olarǵa 43 mıllıon teńge aıyppul salyndy.

– Qazir oqý oryndary 100 paıyz beınebaqylaýmen jabdyqtalǵan. Biraq olardyń tek 82 paıyzy jedel basqarý ortalyǵyna qosylǵan. Onyń ishinde 72 paıyzy – jekemenshik jáne 87 paıyzy memlekettik mekemeler. Eń nashar kórsetkish Jambyl oblysynda, polıtsııaǵa tek 16 paıyzy qosylǵan. Sondaı-aq birde-bir memlekettik bilim berý uıymy qosylmaǵan. Túrkistan oblysynda – 50, onyń ishinde jeke menshik obektiler boıynsha – tek 17 paıyz, - dedi ol. 

Aıta keteıik, elimizde 267 myń orynǵa arnalǵan 232 mektep salynyp jatyr.