Oqý grantyna úmitkerler arasynda muǵalimdik kásip tanymal boldy
ASTANA. QazAqparat - 2016 jylǵy oqý granttary úshin talapkerler kóbirek tapsyrǵan mamandyqtardyń arasynda geografııa jáne alǵashqy áskerı daıyndyq muǵalimdigi tanymal boldy. Bul týraly búgin Astana Bilim granttaryn bólý jónindegi respýblıkalyq konkýrstyq komıssııanyń otyrysynda QR BǴM Joǵary jáne joǵary oqý ornynan keıingi bilim departamentiniń dırektory mindetin atqarýshy Gúlzat Kóbenova málim etti.
Atap aıtqanda, aǵymdaǵy jyly 97 myń talapkerdiń ishinde 60 myńǵa jýyǵy oqý granttaryn alý konkýrsyna qatysýda. Jalpy, 32 myńǵa tarta grant bólinip otyr.
«Qazaq tilinde «Geografııa» baǵytynda bilim alýǵa konkýrs bir orynǵa 28 adamnan, «Alǵashqy áskerı daıyndyq» - 22 adam, «Mýzykalyq bilim» - 18, «Beıneleý óneri» - 14, «Pedagogıka jáne psıhologııa» - 12 adam úmitker. Eger de orys bólimderine toqtalatyn bolsaq, onda «Geografııa» mamandyǵy boıynsha bir orynǵa 18 adam úmitti, «Alǵashqy áskerı daıyndyq» baǵytynda - 15, «Beıneleý óneri» - 11. Bul rette muǵalimdik kásip mektep jáne kolledj túlekteri arasynda tanymal bolyp otyrǵandyǵyn baıqalýda», - dedi ol.
Sonymen qatar G. Kóbenova bıyl tehnıkalyq mamandyqtarǵa stýdentter arasynda eleýli konkýrs baıqalyp otyrǵandyǵyn atap ótti. Qazaq bólimderinde «Geodezııa jáne kartografııa» (bir orynǵa 7-den astam úmitker), «Aqparattyq júıeler» (tórtten astam), «Elektroenergetıka» (tórtten astam) baǵyttarynda konkýrs kóbirek.
Orys tili bólimderinde «Geodezııa jáne kartografııa» boıynsha bir orynǵa altydan astam úmitker, al «Elektroenergetıkada» - tórtten asyp otyr.
Osy arqyly atalǵan mamandyqtarǵa konkýrs ortasha eseppen alǵanda bir orynǵa 2-7 adamǵa úmitti bolǵan.
Munymen qosa, aýyl sharýashylyǵy salasyndaǵy mamandyqtarǵa da joǵary konkýrstyq deńgeı tirkelgen eken. Budan bólek, «Stomatologııa» baǵytynda bilim alýǵa nıettiler kóp tirkeldi. Sondaı-aq orys bóliminde «Halyqaralyq qatynastar» boıynsha bir orynǵa - 22 adam, «Quqyqtanýda» -12 adam úmitti.
«Bıyl memlekettik tapsyrysty qalyptastyrý eldiń áleýmettik-ekonomıkalyq damý basymdyqtaryna negizdeldi. Osy oraıda atalǵan basymdyqtardy eskere otyryp, 12 593 grant tehnıkalyq jáne tehnologııalyq mamandyqtarǵa eskerilgen. Sonymen qatar, 5 000 grant - pedagogıkalyq, 2 690 grant - aýyl sharýashylyǵy men veterınarııa mamandyqtaryna, 3 000 grant - medıtsınalyq salaǵa mamandyqtarǵa bólinip otyr», - dedi QR Bilim jáne ǵylym mınıstri Erlan Saǵadıev.
