Oqý baǵdarlamasy «Taza Qazaqstan» qundylyqtarymen tolyqtyrylady - Juldyz Súleımenova
ASTANA. KAZINFORM - QR Oqý-aǵartý mınıstrligi elimizde Memleket basshysy Qasym-Jomart Toqaevtyń bastamasymen jalpyulttyq sıpat alǵan «Taza Qazaqstan» ıdeıasyn bilim berý júıesine engizý baǵytynda keshendi jumystardy bastady.
Bul týraly búgin Premer-mınıstr Oljas Bektenovtiń tóraǵalyǵymen ótken «Taza Qazaqstan» bastamasyn júzege asyrý máseleleri jónindegi keńeste Oqý-aǵartý mınıstri Juldyz Súleımenova baıandady, dep habarlaıdy mınıstrliktiń baspasóz qyzmeti.
Mınıstr bul baǵytta «Taza Qazaqstan» bastamasy tulǵa tárbıesimen ushtastyrylyp, bilim mazmuny jańa qundylyqtarmen tolyqtyrylatynyn jetkizdi.
Jańartylǵan oqý baǵdarlamalaryna ekologııalyq mádenıet pen turaqty damý mazmuny engizildi. Jaratylystaný, fızıka, hımııa, bıologııa, geografııa, til men ádebıet, adam jáne qoǵam, tehnologııa jáne óner pánderinde ekologııalyq máseleler, tabıǵatty qorǵaý, energııany únemdeý, qaldyqtardy qaıta óńdeý arqyly zertteý daǵdylary keńeıtildi. Bul ózgerister oqýshylardyń tabıǵatqa degen jaýapkershiligin arttyratyn minez-qulyqty qalyptastyrýǵa jáne damytýǵa yqpal etedi.
-Biz búginde bilim salasynda «Adal azamat» birtutas tárbıe baǵdarlamasyn júzege asyryp jatyrmyz. Onyń negizinde – Zań men Tártip, Eńbek adamy jáne «Taza Qazaqstan» ıdeıasy júzege asyrylady. Úsh ıdeıa qoǵamdy toptastyrýǵa jumys isteıdi. Eń aldymen, jańa mazmun sabaq barysynda, sabaqtan tys ýaqytta mektep jáne mektepten tys sharalar arqyly burynǵydan keń formatta júzege asyrylady, - dedi mınıstr.
Mınıstrlik «Taza Qazaqstan» bastamasy aıasynda alty áleýmettik jobany júzege asyryp jatyr. Jastar arasynda «Taza Qazaqstan» taqyrybynda esse baıqaýy uıymdastyryldy. Tujyrymdama aıasyndaǵy keshendi jumystarǵa oqýshylarmen birge ata-analar da belsendi túrde tartylyp jatyr.
Búginde «Jasyl balabaqsha» jobasymen 186 mektepke deıingi bilim berý uıymy, mektepterde 125 myńnan astam oqýshyny qamtyǵan 4 myńnan astam «Jasyl klýb» belsendi qyzmet atqarady. Sondaı-aq qorshaǵan ortany qorǵaý, azamattyq jaýapkershilikti arttyrýǵa arnalǵan 40 myńnan astam balany qamtıtyn jas natýralıster men jas týrıster stantsııalary bar.
Osyǵan deıin Qazaqstanda bilim salasyna jasandy ıntellektini engizý jónindegi jumys toby qurylǵany týraly habarladyq.