Oqý baǵdarlamalarynyń jáne oqýlyqtardyń mazmuny qaıta qaralady
ASTANA. KAZINFORM – Jańa Konstıtýtsııa bilim mazmunyn júıeli túrde jańartýǵa keń múmkindik beredi. Bul ózgerister mektepke deıingi bilimnen bastap, orta mektep, tehnıkalyq jáne kásiptik bilim berý, qosymsha bilim berý jáne tárbıe jumysy júıelerin tutastaı alǵanda, búkil bilim keńistigin qamtıdy. Bul jóninde Úkimet otyrysynda QR Oqý-aǵartý mınıstri Juldyz Súleımenova málimdedi.
Onyń ishinde memlekettiń jalpyǵa bilim berý standarttaryn jańartý jáne ekologııalyq bilim berý standarttaryn daıyndaý qarastyrylǵan.
– Oqý-aǵartý mınıstrligi oqý baǵdarlamalarynyń mazmunyn kúsheıtip, bilim sapasyna kóńil bóletin bolady. Aqparattyq tehnologııalar salasyn jáne tsıfrlyq quziretterdi damytýǵa erekshe kóńil bólinedi. Negizgi basymdyq bastaýysh deńgeıin nyǵaıtýǵa arnalady. Sebebi dál osy kezeńde balanyń aldaǵy bilim berý jolyn aıqyndaıtyn bazalyq bilim, daǵdylar jáne qundylyqtar qalyptasady, - dedi mınıstr.
Oqý baǵdarlamalarynyń mazmuny ǵana emes, oqýlyqtardyń mazmuny da qaıta qaralady. Sonymen birge jyl saıyn 1-synyp oqýshylaryna negizgi pánderdiń jumys dápterleri beriledi.
– Mundaı tásil – sapaǵa baǵyttalǵan zamanaýı ári turaqty bilim berý júıesin qalyptastyrý úshin zor múmkindik. Bastaýysh mekteptiń berik negizi oqýshylardyń bilim alýynyń barlyq kelesi deńgeıinde tabysty damýyna tirek bolady, - dedi J. Súleımenova.
Al 5-9 synyp oqýshylaryna irgeli ǵylymdardy tereńdetip oqytýǵa basymdyq beriledi.
– Sonymen birge 8-9 synyptarda Qazaqstan geografııasy pánin aptasyna eki saǵat kóleminde qaıta engizý qarastyrylyp jatyr. Oqý baǵdarlamalary irgeli bilimdi kezeń-kezeńimen nyǵaıtýǵa arnalady. Joǵary synyptarda barlyq negizgi pándi mindetti túrde oqytý zańnamalyq turǵyda bekitiledi, - dedi mınıstr.
Odan bólek kásiptik jáne tehnıkalyq bilimniń sapasyna da kóńil bólinbek.
– Oqý-aǵartý mınıstrligi ónerkásip jáne kolledj arasyndaǵy baılanysty barynsha nyǵaıtý úshin metallýrgııa, qurylys jáne ІT kompanııalarmen naqty jobalar jáne óndiristegi tájirıbe men teorııalyq daıyndyqty tıimdi ushtastyratyn dýaldy oqytý júıesin kúsheıtedi, - dedi J. Súleımenova.
Sondaı-aq pedagogterdiń kásibı biliktiligin arttyrý, quziretin damytý, ustaz mártebesin kóterý baǵytyndaǵy jumystar da jalǵasady.
Buǵan deıin habarlaǵanymyzdaı, Úkimet otyrysynda elimizdiń ákimshilik-aýmaqtyq qurylysyn jetildiretin zań jobasy ázirlengeni aıtyldy.
