Oqý aqysy bótelkemen tólenetin mektep bar - CNN
NUR-SULTAN. QazAqparat - «Ata-analar balanyń oqý aqysyn plastık bótelkelermen tóleıdi. 32 jastaǵy Orıola Olývaseıı Nıgerııadaǵy Lagostaǵy kommertsııalyq ortalyqqa baryp, kúndelikti bótelke jınaıdy. Osylaısha, tórt balanyń anasy bótelkelermen Morıt halyqaralyq mektebinde oqıtyn qyzynyń oqý aqysyn tóleıdi», - dep jazady CNN basylymy.
Avtordyń sózinshe, Morıt halyqaralyq mektebi ACI (Afrıka tazalyq bastamasy) úkimettik emes uıymymen birlesip mekteptegi oqý aqysyn plastık bótelkelermen qabyldaý jobasyn qolǵa aldy.
«RecyclesPay dep atalatyn joba aıasynda kirisi tómen toptarǵa balalaryn oqytýǵa múmkindik berilip otyr. Olývaseıı sııaqty ata-analar aıyna eki ret óńdeýge jaramdy plastık bótelkelerdi mektepke tapsyryp, oqý aqysyn jabady. Ár 200 keli bótelke 11 dollardy quraıdy. Al halyqaralyq mekteptegi oqý aqysy bir semestrde 24 dollar turady», - dep jazady avtor.
Málim bolǵandaı, jyl saıy Lagosta 450 myń megatonna plastık qaldyq tastalady. Al Nıgerııa plastıkalyq lastaný boıynsha álemde 11-orynda tur.
«ACI jobasy Lagostyń bes mektebinde júzege asyrylady jáne osy jobamen myńnan astam bala oqyp jatyr. Bul jol ekologııalyq problemany sheship qana qoımaı, ekonomıkalyq potentsıaldy da arttyratyny sózsiz», - delingen CNN-da.
