Oqý-aǵartý mınıstrligi qatysýǵa bolatyn bilim olımpıadalarynyń tizimin bekitti
Zııatkerlik saıystar aýyldyq, qalalyq, memlekettik, jekemenshik jáne mamandandyrylǵan mektepterdiń oqýshylaryna arnalǵan.
Olarǵa 2-4, 5-6, 9-11 (12) synyp oqýshylary qatysa alady.
Oqýshylar úshin barlyǵy 142 olımpıada men jarys qarastyrylǵan. Al 33 olımpıada muǵalimderge arnalǵan.
Bul baıqaýlardyń nátıjesi attestatsııa kezinde eskeriledi.
Olımpıadalardyń basym kópshiligin QR Oqý-aǵartý mınıstrligine qarasty «Daryn» respýblıkalyq ǵylymı-praktıkalyq ortalyǵy ótkizedi.
Byltyrǵy oqý jylynda «Daryn» respýblıkanyń 6 362 bilim ordasynyń 266 myń oqýshysyna arnalǵan olımpıadalar uıymdastyrdy.
Bul zııatkerlik oıyndarda jeńiske jetken balalar elimizdiń ulttyq quramasyna qabyldanyp, keıin bedeldi halyqaralyq olımpıadalarda Qazaqstannyń namysyn qorǵaıdy.
«Olımpıadalardyń basym bóligi respýblıkalyq jáne jergilikti bıýdjet esebinen ótkiziledi. Sondaı-aq olar balalar úshin tegin uıymdastyrylady. Onyń ústine olımpıadaǵa qatysatyn balalardyń sany jyl saıyn artyp keledi. Birinshiden, bul bilim salasyn tsıfrlandyrýdyń arqasynda múmkin boldy. Balalarǵa bir jerge barýdyń, qaǵaz jáne qujattardy basyp shyǵarýdyń qajeti joq. Jarysqa qatysý úshin kompıýter bolsa jetkilikti. Ekinshiden, Prezıdenttiń tapsyrmasy boıynsha bıyldan bastap halyqaralyq 7 olımpıadanyń jeńimpazdaryna grant jáne aqshalaı syılyq túrindegi marapattar beriledi. Bul oqýshylarymyzdy yntalandyratyny sózsiz. Mysaly, bıyl qazaqstandyq oqýshylar birden 27 medal jeńip alyp, byltyrǵy rekordty jańartty. Sonymen qatar Oqý-aǵartý mınıstrligi vedomstvo usynbaǵan olımpıadalarǵa qatysý máselesinde muqııat bolýǵa shaqyrady. Ashyqtyqty, akademııalyq adaldyqty jáne olımpıadalardyń sapasyn qamtamasyz etpeı, aqyly jarystar uıymdastyratyn kásipkerler de bar. Ata-analar mundaı olımpıadalardyń basty mindeti - balalar arqyly aqsha tabý múmkindigi ekenin túsinýi kerek. Keıde mundaı kúmándi jarystardy uıymdastyrýshylar azamattardy jańylystyrý úshin mınıstrliktiń logotıpin bekitedi. Tipti keıbireýleri «Daryn» nemese basqa da vedomstvolyq baǵynysty uıymdardyń ataýyn ózderiniń zańdy tulǵalarynyń ataýynda paıdalanady. Osy sebepten ata-analar men muǵalimderge tolyq tizimmen tanysýǵa keńes beremiz. Biz qazir muǵalimderge arnalǵan konkýrstardyń, ásirese pánder jetispeıtin jáne áriptesterimizden suranystar bolǵan pánder boıynsha tizimdi keńeıtip jatyrmyz», - dedi QR Oqý-aǵartý mınıstrgi Orta bilim komıtetiniń tóraǵasy Gúlmıra Kárimova.
Mınıstrlik bekitken olımpıadalardyń tolyq tizimimen myna jerden tanysýǵa bolady.
