Oqý-aǵartý mınıstrligine jańa fýnktsııalar júkteldi
ASTANA.KAZINFORM – Úkimet qaýlysymen Oqý-aǵartý mınıstrliginiń fýnktsııalary keńeıtildi.
Atap aıtqanda, bilim berý uıymdaryna qabyldaýdyń úlgilik qaǵıdalaryn, jalpy bilim berýdiń barlyq deńgeıindegi baǵdarlamalardy, sondaı-aq tehnıkalyq, kásiptik jáne orta bilimnen keıingi bilim berý baǵdarlamalaryn iske asyratyn uıymdarǵa qabyldaý tártibin bekitý mınıstrlikke tapsyryldy.
Atalǵan tizimge olımpıadalyq rezervtegi mamandandyrylǵan mektep-ınternattar men kolledjder, sondaı-aq sportqa beıim daryndy balalarǵa arnalǵan respýblıkalyq, oblystyq jáne astanalyq mektep-ınternattar kirmeıdi.
Sonymen qatar vedomstvo bilim berý salasyndaǵy ózgerister kóshbasshylaryn irikteý jáne daıarlaý qaǵıdalaryn ázirlep, bekitýmen aınalysady.
Oqý-aǵartý mınıstrligi mektepke deıingi, orta, tehnıkalyq, kásiptik, ortadan keıingi jáne qosymsha bilim berý júıesinde, sondaı-aq balalardyń quqyqtaryn qorǵaý salasynda kóleńkeli ekonomıkaǵa qarsy is-qımyl sharalaryn qabyldap, memlekettik saıasatty qalyptastyrýǵa qatysady.
Qaýly kúshine endi.
Buǵan deıin Oqý-aǵartý mınıstrligi joǵary synyp oqýshylaryna mektepten kásibı mamandyq ıgerip shyǵýǵa múmkindik beretin pılottyq jobany júzege asyryp jatqanyn jazǵanbyz.